立法會議員鄭松泰因為倒插國旗、區旗，被控侮辱國旗、區旗罪兼被判罪成，立法會就開咗個調查委員會調查鄭松泰，結果委員一致認為鄭松泰「違反誓言」（應該係指佢違反宣誓時會效忠特區嘅誓言）同「行為不檢」，對鄭松泰提出譴責議案，鄭松泰分分鐘連議席都可能失去。喺呢個是非對錯非常清晰嘅事件上，近年盲反政府「反上腦」嘅民主黨有個叫許智峯嘅議員，竟然話鄭松泰「行為」可能令市民有「正面感覺」？廣男真係想了解下，許智峯講出呢番「瘋人瘋語」，到底係咩邏輯呢？

倒插國旗或感覺正面？

廣男暫時未有機會睇到呢份報告，不過綜觀傳媒報道，報告顯示民主黨許智峯就鄭松泰倒插國旗、區旗作供嘅時候，許智峯話自己無留意鄭松泰喺事發時候嘅行為，但就認為市民可能會有「正面感覺」，因為對國家同政府不滿嘅市民，會期望議員幫佢哋出氣，又認為事件與立法會誓無關。

許智峯作為立法會議員，又作為白鴿黨「悉心裁培」嘅議員，為咗撐鄭松泰講埋呢啲歪理，廣男都唔知覺得好嬲定好笑。首先，有市民唔滿意政府甚至中央，喺自由開放嘅香港，真係一啲都唔出奇。問題癥結係，一個宣咗誓會效忠特區嘅立法會議員，應唔應該咁樣侮辱自己國家同特區嘅旗幟，許智峯話有市民可能有「正面感覺」，根本同鄭松泰應唔應該咁做，係兩回事！

民主黨全面退出政壇 市民或有正面感覺

況且，套用許智峯嘅「神邏輯」，唔通但凡市民覺得正面嘅事，佢同白鴿黨就會義無反顧支持？就算所謂「市民覺得正面」嘅事係違法、有違道德、喪盡天良、泯滅人性都好，唔通佢同白鴿黨又會支持呀？算把啦，許智峯！

其實民主黨近年議政越做越差，又成日搞埋啲政治小動作，甚至為做政治騷搞眾籌，廣男都可以大膽講句，如果民主黨全面退出政壇，市民都好可能有正面感覺喎，睇吓邊班市民啫，許智峯同佢班黨友又會唔會咁做呀？廣男就覺得，支持「自己友」，冇問題，但就算要盲撐「自己友」，都搵個好啲嘅理由啦，許智峰立法會、區議會兩份糧加埋過十萬蚊，論政水平係咪可以再提高啲呢？ 

原圖：RTHK