「我寧願做一秒鐘英雄，都唔要做一世烏蠅！」呢句港產片《旺角卡門》既對白，相信唔少70、80後都有印象。廣男細細個睇港產片聽到呢句對白既時候，第一個感覺就係「嘩，好型呀」，一句驚天動地既金句，然後一個轉身「慷慨就義」，呢份氣魄真係令人刻骨銘心。但係大個之後，套用一句俗氣，就係「嘩，駛唔駛咁型呀？」

之所以話「駛唔駛咁型」，廣男想點出既重點係，型要付出代價架！例如，電影裡面逞一時之氣既人，的確係型，但往往代價係連命都無埋。現實生活入面，亦都有好多型住嚟付代價既例子，例如某君好型咁鬧老師，喺同學面前威風八面，但就畀學校重罰，有苦自己知。

近日，社會上唔少聲音話參與公民抗命、違法「佔中」既青年人係英雄，甚至話人人都可以做英雄，廣男對呢種講法真係不敢恭維。第一，係唔係要咁樣先做到英雄先？抗命都算英雄既話，咁警察拉犯法既人係唔係真英雄？第二，做所謂英雄有咩代價要付呢？係唔係英雄犯法可以免刑責？仲有，如果人人都可以做英雄，即係人人都可以因正義之名違法，咁香港會變成點，相信大家想像到。

可能好多人會誤以為佔領中環最多留下案底罰下錢，就算唔駛坐監，留案底對未來發展既影響可大可小，好可能無得做紀律部隊、專業人士、難移民升學等等。學聯預演「佔中」當日，就有學生為免前途受影響，停止「佔中」走上行人路。可能有人會用無膽匪類、中途縮沙等口脗去攻擊離開「佔中」行列既人，但其實為自己、家人未來打算，先至係有承擔既表現；如果因為「佔中」留案底，唔係以為有外國名校收，美資企業預留職位呀？

做一秒鐘「英雄」，付一輩子代價，認真問下自己，值唔值？如果設想到自己將來升學、就業甚至失業都無問題，廣男亦無話可說，只能祝君好運。

原圖：huffingtonpost.ca