民主黨林卓廷、尹兆堅等人開晒記者會、搵人拍埋片，話要就UGL事件眾籌「公義」追究梁振英，不過睇晒成個記者會，囍雨完全Feel到佢哋根本係「炒冷飯」，仲要係想老屈梁振英果隻；而每逢一班「乳鴿」做政治騷，都會引起網民一陣熱議，對於今次民主黨班人玩「政治謀殺」仲想市民科水，有網民提出咗非常一針見血嘅評論，就係民主黨啱啱黨慶先籌咗幾百萬，而一班民主黨立法會議員每個月都有十萬八萬月薪，點解仲要掠市民水呢？

民主黨自肥 掠市民血汗錢？

對於民主黨諗到問市民攞錢做政治騷嘅新招式，囍雨除咗留意林卓廷等政客又點「屈」人之外，梗係要睇下啲網民點留言啦。噚日囍雨就講過，民主黨今次眾「籌」計劃叫天下為公，有網民就笑個計劃係天下為「供」先啱，即係叫市民科水畀佢哋去玩嘢。囍雨今日再睇啲網上輿論，有非常精明嘅網民，就質疑佢哋啱啱黨慶先籌到幾百萬，而幾隻「乳鴿」議員每個月人工又有9萬幾蚊，但自己一個仙都唔出，喺議會又唔做嘢，而家仲要叫人畀錢幫你班中上產，囍雨聽落都覺得好唔合理！

老實講，囍雨覺得呢位網民可以話係點中要害，而家係民主黨呢班議員要玩嘢、要做政治騷，點解要市民幫你哋「埋單」呢？林卓廷等人口口聲聲話要追求「公義」，既然咁「公義」，佢哋自己嘅議員薪津又咁高（林卓廷、鄺俊宇仲係雙料議員，人工應該over十一萬），你哋點解一蚊都唔出？唔講你哋，講民主黨喇，你哋啱啱先喺黨慶籌咗成500萬，要攞2、300萬蚊出嚟，應該冇乜難度架喎，仲問市民攞錢？啲錢籌咗之後畀咩專業人士做嘢先？係咪盲反派啲「自己友」律師、會計師？成單嘢真係非常之可疑！

林卓廷等人已犯下刑事罪？

仲有一點囍雨覺得大家可以留意，林卓廷或者佢嘅黨友話眾籌啲錢可能會用嚟幫啲人喺全世界各地「追究」梁振英，唔知呢一種講法會唔會已經犯下「助訟」、「包攬訴訟」等罪行呢？囍雨就覺得，如果林卓廷佢哋真係用啲錢畀人去打官，或者支持你哋去提出訴訟，真係分分鐘可能犯法。

喺囍雨執筆嘅時候，睇新聞見到梁振英已經向林卓廷等人發律師信，仲講明UGL協議係得到戴德梁行董事會主席同意去傾嘅，雙方仲協議埋點避開利益衝突，囍雨睇嚟林卓廷嘅言論都極有可能涉及誹謗；其實佢向市民眾籌，係咪想玩到自己畀人告，籌定錢幫自己打官司呢？如果係嘅，囍雨只能講句，搞政治騷搞到畀人出律師信warn，林卓廷都算係經典喇！ 

原圖：takungpao