素來喜歡為廉署「扮代表」嘅林卓廷，一向「哪裡有水抽，就往哪裡抽」，近日佢同佢民主黨班「隊友」又有新搞作，話要搞個「天下為公」眾籌計劃（Wolf-Hunting Campaign），調查UGL事件同追究梁振英，開記招同搵埋一班人拍短片話要眾籌「公義」、「香港人告CY」等等。囍雨睇晒佢哋成個記者招待會，只能夠以「炒冷飯，玩老屈」形容呢班「乳鴿」，佢哋嘅舉動甚至令人懷疑，佢哋其實係咪借眾籌向公眾籌一筆錢，然後又搵番自己啲律師、會計師「做嘢」，一邊自己人又有錢賺，一邊又可以繼續做政治騷呢？

天下為公 天下為「供」？

每當見到林卓廷呢班政棍出嚟嘅新聞，囍雨同好多網民一樣，「識得睇，梗係睇留言啦！」，囍雨睇一個社交媒體報道、直播嘅留言，見到有網民直斥林卓廷佢哋「又出嚟搵錢」、「當香港人傻」，仲話所謂「天下為公」，實則就係天下為「供」，即係叫市民「供款」畀呢啲政客；又有網民話盲反派一直多法律同稅務專家，屈咗人幾年都屈唔到，而家叫人畀200萬佢哋，質疑係咪收咗錢就屈到梁振英。又有網民話，其實佢哋想向律政司施壓，點都拉CY上庭，等佢哋繼續有嘢燒，就算施壓不成，都可以話個政府唔公義，有show做、有錢收，幾正！其實呢班網民都講得相當之有道理，盲反派要屈人仲想市民畀錢佢哋屈人，又真係搞笑咗啲嘅。

囍雨話民主黨林卓廷呢班人「屈人」，絕對唔係無的放矢架，例如林卓廷大大聲喺記者會讀UGL喺2014年嘅聲明出嚟，想話畀人聽梁振英同UGL一早就開始傾協議；但係呢，林卓廷讀果段聲明嘅下幾句，個聲明就講到明無論係戴德梁行、蘇格蘭皇家銀行以至其他顧問都知道協議同扮演重要角色，點解林卓廷又要「斷章取義」、讀啲唔讀啲呢？因為只要睇清楚成份聲明，就會知道涉事各方持份者都知情甚至參與，成件事根本就無Case，林卓廷會唔會話畀人聽個協議冇問題，叫人唔駛捐錢畀佢哋？梗係唔會啦！佢哋要搞政治騷、要拉市民落水之餘，根本就係一心想用市民捐款嚟搞事，對住佢哋呢啲「語言偽術」，真係「認真你就輸了」！

林卓廷往績差、口碑劣

老實講，自從「乳鴿」自編自導自演「釘書釘」事件﹐，每次林卓廷行出嚟話有咩新搞作，囍雨都會先諗一諗呢條友到底想點。大家諗下，仲記得林子健「釘書釘」事件，林卓廷陪佢出嚟疑似齊齊作故仔，話有人擄走林子健。今次林卓廷再一次出嚟政治攻訐梁振英，仲想市民科水畀佢一齊搞事，好可疑囉！凡事講證據，講埋啲失實嘢，叫人科水，傻的嗎？

原圖：「天下為公」Facebook截圖