違法佔領行動發起人戴耀廷去台灣參加「五獨」論壇，一番「港獨」言論引來全城讉責。眼見「自己友」畀人鬧到飛起，盲反派試問又點會坐視不理呢？佢哋日前搞咗場集會，聲稱要聲援戴耀廷同埋捍衛言論及學術自由；但成個集會最搞笑嘅，係竟然有班「港獨客」去捧場，期間仲有人高舉「香港獨立」旗幟同龍獅旗。廣男又真係有啲好奇，戴耀廷成日聲言自己唔係搞「港獨」，但佢嘅集會招來一班「港獨」客，廣男真係好想聽下佢點解釋，係咪啲「港獨客」又「誤會」咗佢，以為佢係「自己友」呢？

盲反派集會 「港獨」派捧場

我哋有時睇一件事，除咗要睇涉事人自己嘅「解說」之外，都要睇下件事嘅客觀效果係點嘅。戴耀廷一直聲稱自己唔係搞「港獨」，只係鋪陳出層層假設；廣男唔理言者「有冇心」，但「聽者有意」就必然架喇，如果唔係盲反派搞聲援戴耀廷嘅集會，又點會引嚟一班「港獨友」，班「港獨友」仲要喺度舉「港獨旗」呢？

更有趣嘅地方，係據報有多個「獨派」學生會中人投訴主辦單位唔畀佢哋上台發言，批評盲反派人士口口聲聲話尊重言論自由，實則只係「得把口」。如果按情理分析，盲反派班人應該係驚啲「獨派」人士上台宣揚「港獨」，搞到佢哋個集會變咗「港獨」集會，所以就寧願肉酸啲唔畀人上台講嘢。但根據盲反派嘅邏輯，講「港獨」唔係言論自由嘅體現咩？如果講「港獨」係理直氣壯嘅事，佢哋又駛乜咁避忌？好明顯，佢哋好可能係心中有鬼，知道「港獨」言論「說不出口」啦！

戴耀廷又再詭辯

喺呢個聲稱捍衛言論自由但又唔畀人講嘢嘅「古怪」集會，戴耀廷貫徹佢近日嘅口風，重申自己冇鼓吹「港獨」。廣男又要喺度點出佢講嘢嘅謬誤喇，戴耀廷之前話「反專制成功後」，大家（香港）可以考慮成功獨立國家，仲叫人諗多啲「以後」，因為「我們一定會成功」，廣男想問清楚「反專制」係咩意思先？如果戴耀廷係叫人反抗現有政權再考慮「港獨」，仲諗住一定會成功，咁一定係搞「港獨」啦；掉番轉，戴耀廷如果係想「被動」地「反專制」，無論結果係點，其實佢一樣係呼籲香港可以喺中國裡面獨立出嚟，一樣係搞分裂，一樣係搞「獨立」。廣男真係好想知道，戴耀廷點樣叫人考慮「香港獨立」而又唔係搞「港獨」呢？（苦笑…） 

原圖：RTHK