違法佔領發起人戴耀廷去台灣出席「五獨」論壇，發表「港獨」言論被全城怒轟，同樣有出席論壇嘅仲有盲反派資深政客劉慧卿、浸大前學生會會長劉子頎同埋中大前學生會會長周竪峰。囍雨上次講過劉子頎一番說話擺明係借反普通話搞埋「港獨」，其實曾經瘋狂侮辱內地人嘅周竪峰嘅言論一樣非常「驚人」。佢話「中國絕對係敵人」，如果話佢係中國人佢會覺得係好大嘅侮辱；囍雨就覺得，有周竪峰呢啲人做中國人，似係我哋受緊侮辱多啲喎。

誰在侮辱誰？

其實周竪峰仇恨中國、中國人，都唔係咩新聞嚟架喇，否則佢就唔會喺校園裡面係咁用粗口鬧內地同學，仲好似想打人咁款啦！不過，佢今次走出香港，去到台灣話中國係「敵人」，話如果將佢講成中國人，佢會覺得係好大侮辱，就更加過份啦！因為佢係唔係中國人，唔係佢聲稱係咩就係咩嘅，佢事實上就係中國人，佢唔鍾意呢個身份都好，都唔代表佢可以侮辱中國同中國人。調番轉咁講，囍雨覺得似係其他中國人畀佢侮辱緊多啲！

另一個問題，囍雨認為周竪峰同戴耀廷、劉子頎一樣，都係喺度煽動緊「港獨」，佢雖然冇直接話要搞「港獨」，但係佢引用有海報寫住「拒絕沉倫，唯有獨立」之後，又話要「救香港」，好明顯，佢徹頭徹尾都係一個「港獨」份子，仲要係激進果隻。

不要再扮學術討論

老實講，聽咗呢班人喺個「五獨」論壇講嘢，囍雨點睇都唔覺呢個係學術論壇，嚴格嚟講，呢個係「聲討」自己國家嘅集會先啱，戴耀廷就話香港可以考慮「建立國家」，劉子頎就借反普通話反中國，周竪峰就講「獨立救港」，根本就係一場煽動作反嘅集會。

當盲反派班人係咁話呢啲係學術、自由討論嘅時候，囍雨真係好懷疑，佢哋係真唔知道咩叫學術討論，定係知道戴耀廷觸動到國家底線，而勉強搵啲嘢幫佢哋「死撐」呢？

原圖：RTHK