違法佔領行動發起人戴耀廷因為到台灣出席「五獨」論壇時發表「港獨」言論，搞到自己畀全城怒轟；其實同場出席論壇嘅香港人，仲有盲反派資深政客劉慧卿、中大前學生會會長周竪峰同埋浸大學生會前會長劉子頎等人，其中劉子頎更加攞埋浸大嘅普通話考試嚟講，又話香港要有「當家作主嘅準備」。咁講法，即係劉子頎唔單只唔滿意要學普通話，仲想搞「港獨」？

被迫學普通話？

囍雨睇番劉子頎當日嘅發言，其實都幾好笑，班盲反派唔係話呢個係有關學術嘅論壇嚟咩？做咩成班人一味喺度鬧政府、鬧中央嘅呢？而劉子頎作為香港浸會大學嘅學生，幾乎一開場就話自己畀人迫學普通話同考試，對此表示唔認同；囍雨又想問下，如果劉子頎唔想學普通話，其實佢去到台灣咪又係要講普通話，囍雨建議佢同主辦單位講，「我係香港人，你哋搞論壇做咩要我講普通話呀？廣東話好重要架嘛！不如你哋學廣東話啦！」

其實呢，中國人、香港人之所以要學普通話，唔係單單因為自己係中國人咁簡單嘅，因為學普通話，根本就有實際需要；以劉子頎為例，學校畀晒機會佢學普通話，佢自己又唔多用功，咁佢自己去到台灣要講普通話嘅時候，就自然講得「普普通通」啦！學好語言，例如包括普通話嘅兩文三語，係學生裝備自己嘅「基本功」，劉子頎連「基本功」都未做好，就喺度諉過於人，真係未免有啲貽笑大方喇！

心底裡想搞「港獨」嗎？

另外，劉子頎又話台灣以血肉換取民主，香港人仲未有呢個決心，期望「到中共真的不行的時候，我們香港要有當家作主的準備」，言下之意，佢係要秉承戴耀廷嘅說法，又係想搞「港獨」？囍雨有理由相信，劉子頎絕對唔係抗拒普通話咁簡單，而係抗拒中國、要搞「港獨」！

老實講，劉子頎佔領校園、圍堵教師單嘢都未完，轉頭又同戴耀廷呢啲政客去台灣播「獨」，佢係咪真係以為有言論自由，就可以「圍老師、搞『港獨』」先？如果係嘅話，浸大真係要諗下點處理呢啲學生，佢今日可以圍教師，聽日可以喺校園播「獨」，後日就可以「付諸行動」架喇！ 

原圖：RTHK