違法佔領發起人戴耀廷到台灣出席「五獨」論壇，席間發表港人可以考慮「獨立建國」嘅「港獨」言論，結果畀全社會圍插，搞到戴耀廷都話自己係被「殺雞警猴」嘅果隻「雞」。正所謂「敵人嘅敵人」就係朋友，雖然戴耀廷係錯到離晒譜，但盲反派依然基於政治立場盲撐佢，仲出聲明話會堅決維護言論自由同學術自由，叫人停止攻擊同打壓戴耀廷。其實呢，盲反派話尊重言論自由，真係十分可笑，因為囍雨覺得，一直以嚟最唔尊重自由嘅，正正就係盲反派呢班政棍！

政改的照妖鏡 – 盲反派瘋狂打壓同路人

點解囍雨咁講盲反派？囍雨認為大家最少可以喺前幾年嘅政改問題搵到三個例子，睇番盲反派點樣專橫法。第一單，就係喺2013年，民主黨創黨主席李柱銘提出咗一個務求爭取幾個候選人包括盲反派人士入閘嘅政改方案，結果畀其他盲反派支持者「圍插」，搞到佢要呯呯聲收回方案，仲話自己鹵莽、「老貓燒鬚」。一個盲反派元老，因為提出咗一個其他「自己友」唔滿意嘅方案，搞到畀人圍剿，你話盲反派有幾尊重言論自由呢？

第二個例子，就係人稱「中間超人」嘅前民主黨成員、前立法會議員黃成智，佢因為曾經公開呼籲「袋住先」，畀民主黨中委會以投票方式，通過開除黃成智嘅黨籍。嗱，黃成智嘅為人、從政風格，囍雨就不便評論喇，但如果民主黨真係因為政見唔同就開除人黨籍，仲要係有份同佢打生打死嘅創黨成員黨籍，呢啲係民主？呢啲係尊重言論自由？唔好玩啦！

要數盲反派唔尊重言論自由嘅例子，真係不勝枚舉，喺政改期間，除咗直頭畀人踢出黨嘅黃成智，之後自己退出公民黨嘅湯家驊，都係因為支持唔同嘅政改方案而飽受所謂「同路人」嘅攻訐。所以，當盲反派話自己要捍衛言論自由，囍雨只能講句，「得啖笑」！

煽動「港獨」非言論自由

講到呢度，囍雨要包番句，囍雨話盲反派唔尊重言論自由，唔代表囍雨認為戴耀廷煽動「港獨」係言論自由嘅體現嚟嘅；因為言論自由從來都唔係完全無界線，而「港獨」作為違憲違法嘅行為，戴耀廷根本就係違法！盲反派選擇袒護佢，一嚟侮辱咗法律，二嚟佢哋自己都唔尊重言論自由，試問又邊有資格用嚟做擋箭牌呢？

原圖：RTHK