可能因為年紀開始大，廣男不時都會留意下啲有關教育下一代嘅文章。前幾日廣男睇報紙，見到「五個小孩的校長」呂麗紅寫咗一篇關於育兒嘅文章，題目為《萬般皆是A》，無論係外國嘅研究報告，抑或係商品廣告說明等等，統統都同小朋友嘅成績拉上關係，好似樣樣嘢都同奪A拉上關係。呂麗紅仲話，而家流行講「初心」，一個育兒初心，希望大家都朝着孩子健康快地成長而努力進發，廣男睇完亦諗咗好耐，自己到底做唔做到呂麗紅所講咁呢？

奪A就是一切？

對於呂麗紅一番肺腑之言，廣男實在不能同意更多，因為廣男而家眼裡所見，好多時啲家長喺講到「湊仔經」嘅時候，都會將「最緊要細路仔健康快樂成長」掛喺口邊，不過到做嘅時候呢，就變咗另一回事喇；有唔少家長，除咗要求仔女做好功課、溫好書之外，仲要學好多唔同嘅興趣班，英文、珠心算、鋼琴、游水、跆拳道等等，甚至連面試、記憶都可以學，廣男見到呢啲興趣班，有時都會心諗，係咪真係咁多嘢要學呢？

廣男咁樣講，唔代表廣男覺得成績唔重要，只係真心認為成績唔代表一切。打個比喻，如果一個小朋友畀人催谷到成績好好，但年紀細細已經身心俱疲，或者連中學都未讀，就已經對學習完全失去興趣，咁樣仲係唔係好事呢？廣男之前睇過唔只一個育兒故事，當中嘅小朋友學習都唔錯，但原因並唔係因為家長「谷」得勁，而係透過協助佢哋閱讀啟發咗佢哋對學習嘅興趣，久而久之，閱讀、學習就變成自發性嘅興趣，廣男作為一個小朋友嘅爸爸，都好認同呢種教學方法。

贏在起跑線？

老實講，如果小朋友能夠「贏在起跑線」，咁當然係好事，不過人生確實唔係只有起跑線，有人係贏在起跑線，繼而又贏在終點線，但呢個世界亦都有好多人輸在起跑線，但最後贏在終點線。喺未來係不可知嘅情況下，廣男都係覺得與其不斷催谷，不如順其自然，就住小朋友嘅真正專長同興趣發展，廣男呢啲「懶惰」家長，最多都係陪小朋友睇下書，培養下佢啲學習興趣算喇。 

原圖：文匯報