素有「長洲覆核王」稱號、成日提出司法覆核但又成日畀法庭判敗訴嘅郭卓堅，近嚟又有新搞作，佢今次搞搞新意思，要入稟高等法院，私人檢控前特首梁振英收咗UGL錢，仲叫晒口號話自己伸張正義。其實，郭卓堅鍾意透過法律程序「玩嘢」，都已經唔係新鮮事喇，不過佢連UGL事件都好似未搞清楚，就話人涉嫌違反防賄條例，真係貽笑大方。其實，郭卓堅搞咁多嘢，真係為公義？定係為自己博出鏡？抑或有其他著數？佢自己最清楚。

連咩事都未知就要告人？

對於任何人要提出法律程序，囍雨都會表示尊重，但郭卓堅話人涉嫌犯法，仲話自己伸張正義，囍雨又要問下佢知唔知UGL事件係點先？好簡單一個道理，UGL協議作為一份普通過普通嘅離職協議，喺商界嚟講好平常，當時梁振英唔係戴德梁行董事，佢本人未開始選特首，又加入唔可以有利益衝突嘅條款，乜同人簽離職協議都唔得？更重要嘅係，連UGL或者率先報道事件嘅澳洲傳媒都證實各方持份者包括UGL、戴德梁行董事同管理層、涉及收購交易嘅銀行等都知情，一份各方知情甚至係充分參與嘅離職協議，囍雨又想問下郭卓堅件事「貪」喺邊一度，「失當」又喺邊一度呢？

郭卓堅提告或有政治目的

另一個問題，就係郭卓堅話件事應該交畀法庭去判，囍雨真係極度質疑佢嘅法律知識，或者佢咁做係咪有政治目的。郭卓堅「提出」司法程序咁多次，唔通佢唔知道，一件事係咪交到畀法庭審理，律政司係要睇有冇證據顯示有人犯法，然後先提到法庭審理嘅咩？郭卓堅而家提私人檢控其中一個目的係要律政司提告，即係冇證據顯示有人犯法佢都要律政司提告？咁樣算唔算係逼迫律政司先？呢件事真係越諗就越唔合理！

濫用法援 納稅人付鈔

無論係郭卓堅嘅理據，抑或佢似係想迫律政司「做嘢」嘅動機，囍雨實在懷疑郭卓堅今次提出私人檢控，背後有咩目的呢？大家諗下，郭卓堅已經「無無聊聊」咁入稟，話梁振英幾年前宣誓就任特首果時讀漏字要DQ梁振英，結果敗訴兼被判要支付訴費；而家佢更進一步，話要就無Case可言嘅UGL事件提出私人檢控，一次又一次針對梁振英，連案情都唔清楚就去告，仲次次動用公帑以法援去告，真係佢玩嘢納稅人付鈔，仲成為法援署班外聘律師嘅大客仔添。

原圖：無綫新聞畫面截圖