喺早排立法會港島區補選僥倖以不足一萬票勝出嘅區諾軒，參選期間被揭發曾經燒《基本法》，有極大「唔擁護《基本法》」之嫌。雖然佢冇被選舉主任DQ，但有市民就入稟質疑佢參選資格，雖然法院仲未有決定，但呢個區諾軒仍不知收斂，近日更正式聘用「香港眾志」成員出任立法會議員助理，仲話請「眾志」成員做助理係「天經地義」添；呢種死都唔肯同「自決」主張切割嘅態度，已經曲線證明佢自己並冇真正擁護《基本法》啦！ 

「自決」主張肯定違反《基本法》

全香港都知，「香港眾志」主張嘅係違反《基本法》嘅「自決」，所謂「自決」，簡而言之係認定「港獨」係香港未來選項之一，意即並唔反對「港獨」。唔講唔知，查實高等法院法官喺審理「港獨份子」陳浩天嘅選舉呈請案時就講到明，《基本法》唔理點修改，都唔可以修改到「港獨」嘅程度；換而言之，主張「自決」，其實即係違反《基本法》，呢點法律上係非常清晰嘅。

區諾軒請「眾志」成員做議員助理，代表呢班人將會收取由公帑支付嘅薪酬，用香港人嘅血汗錢去養一班違反《基本法》嘅人，原則上已經好大問題啦！再者，立法會議員助理，可以喺立法會「自由出入」，甚至可以喺所屬議員辦公室嗰一層自由行動，呢個好明顯就會出現保安漏洞啦，「自決」違反《基本法》，即係佢哋係以推翻整個憲制為目標，搞革命嘅人，有乜係做唔出先？佔領立法會，甚至做其他「港獨」份子嘅內應，真係一啲都唔出奇。

「港獨」議助衝擊立會有前科

囍雨並唔係危言聳聽，而係有前車之鑑。大家記唔記得「青年新政」兩個侮辱全球華人嘅壞蛋呀？佢兩個當時咪就係用公帑請咗大批「港獨」份子做立法會議員助理囉，之後發生咩事呢？咪就係有人聯同大批助理去衝擊立法會會議，期間粗口辱罵立法會保安員，事件甚至令到有保安員受傷入院添。嗱嗱嗱，雖然單案就仲審緊，不過呢啲都係庭上客觀證據，冇屈佢哋架！

區諾軒話就話係周庭代替品，但查實佢本身退出咗民主黨都冇一年，相信唔少市民仍然覺得佢立場應該會較溫和，唔會搞到「自決」，甚至「港獨」咁激。之後雖然被揭發曾經燒《基本法》，唉，不過算啦，唔贏都贏咗，咪「聽其言、觀其行」囉，點知真係不幸批中，呢個區諾軒根本係「自決友」，囍雨喺呢度除咗咪呼籲之前已經入稟挑戰佢嗰位市民要企硬之外，亦希望全港市民齊齊睇實，唔好畀佢有機會用公帑搞「偽自決，真港獨」！

圖片來源：大公網