今朝立法會政制事務委員會討論《國歌法》本地立法內容，盲反派繼續靠嚇，極力嘗試自製恐慌，務求成功誤導市民，等人以為好易誤墮法網。好似公民黨黨魁楊岳橋咁，佢今日又出口術，佢問政制及內地事務局長聶德權，立法後若然公開播李克勤所唱嗰首、歌詞中有幾句國歌歌詞嘅《球迷奇遇記》會唔會構成犯罪行為。作為執業大狀，楊氏提出咁低水平嘅問題，簡直係侮辱咗「法律」兩個字呀！

侮辱國歌入罪門檻高

點解囍雨咁講？查實眾所周知，香港實行嘅係《普通法》制度，喺刑事罪行嘅檢控上，控方需要證明疑犯「既有意圖，亦有實際行動」，先至可以將疑犯入罪。睇返《球迷奇遇記》內嘅幾句歌詞，個背景係1998年世界杯決賽周係法國舉行，香港的時間比當地快7個鐘，法國個邊開波時間正正係香港深夜時份，幾句「起來起來起來起來」本身就係想表達球迷為睇波而要捱更抵夜嘅意思，根本就同國歌拉唔上關係，更遑論意圖侮辱國歌。

面對咁低質無聊嘅提問，聶德權都算係好耐性喇，話睇唔到公開播放《球迷奇遇記》會構成《國歌法》的犯罪行為。講真吖，政府選擇為《國歌法》進行本地立法，無非因為《國歌法》係刑事罪行，而喺香港，刑事罪行正正係由司法獨立嘅香港法院審理，法庭絕對唔會單憑「行為」就判被告罪成，仲會考慮埋前因後果、案發時序，當然亦包括犯罪意圖，全面考慮後先至會做判決。一般市民只要正常對待國歌，根本唔需要擔心入罪。

誤墮法網屬無稽之談

事實上，《國歌法》的條例草案寫得很清楚，參與和出席奏唱國歌場合時須要肅立和莊重，如果並非出席有關場合，又或者只係路過，呢啲根本唔係規限範圍。嗰啲話將來路過時代廣場遇上大電視奏國歌，若不肅立都會受罰嘅言論，根本就係危言聳聽！

盲反派若繼續以抹黑《國歌法》嘅手段，去製造恐慌誤導公眾，不單白費心機，更加只會凸顯自己的低質與無聊，請佢哋唔好再侮辱公眾嘅智慧，尤其係嗰班受過法律專業訓練嘅反對派大狀，唔好侮辱埋自己所受嘅法律訓練啦！

圖片來源：RTHK