喺香港地，廣男相信而家最困擾我哋呢類青年嘅問題，一定係「住屋」，相信香港好多人都因為住屋問題，多多少少都影響到生活計劃。廣男今日睇新聞，話有個港男月入2.4萬元，自覺無能力買私樓，同阿媽住緊公屋，搞到女仔都唔敢追，仲話自己「抽唔到居屋就唔結婚」。講到咁嚴重，真係睇到廣男好唏噓，不過面對呢種窘境，係咪完全無解決方法呢？廣男又唔係咁諗喎！

居屋係關鍵？

喺樓市處於高峰位嘅時候，有樓喺手當然安心好多啦，至於冇樓喺手嘅年青人，就難免會焦躁啲架喇。今次新聞所講嘅男主角，行年37歲、單身、月入2.4萬元，自覺無能力買私樓，同阿媽住喺公屋度，由於自己用白表單人身份抽居屋嘅機會好渺茫，所以搞到有鍾意嘅女仔都唔敢追，仲話自己如果抽唔到居屋就唔結婚。

廣男承認，如果冇一個屬於自己嘅安樂窩，的確係幾影響生活計劃嘅，但係咪無樓，唔好話結唔結婚先喇，要連女仔都唔可以追？可能有部分女仔揀男朋友、老公嘅時候，都會睇佢經濟能力同埋有冇樓，但廣男唔相信呢個係唯一條件；如果話有樓先追到女仔，廣男反而都見唔少人標榜自己有樓有車，但都係追唔到女仔喎！世事無絕對嘅。

其實，2.4萬唔係一個高嘅收入數字，但亦都唔算低啦，香港人嘅月入中位數先係萬幾蚊，呢個「男主角」又唔係真係咁差啫。況且，如果果位港男認識到女仔願意同佢「公一份、婆一份」，其實就算買唔到樓住，租樓住住先都冇乜問題。廣男成日覺得，有一個同自己嘆世界嘅女朋友係好，但如果搵到個肯同自己捱世界嘅，就更加難能可貴。所以果位港男，實在無需要妄自菲薄！

不過當然，如果居屋嘅數量多啲，大家就唔駛喺私樓市場追價追得咁辛苦，青年可以安居，自然都冇咁躁底啦！

說好的增加供應呢？

講開居屋，又令廣男諗起政府話要尋求共識，搵方法增加土地供應，明明上屆政府雷厲風行，搏命增加土地供應，但今屆政府就好似冇咩聲氣，市民大眾又仲未傾得掂做邊樣先；其實呢，大家應該少啲理政治爭拗，多啲關注關乎自身命運嘅房屋、土地政策同問題多啲！

原圖：gov.hk