民族黨陳浩天喺上次立法會換屆選舉因為提倡「港獨」而被選舉主任DQ，佢之後提出選舉呈請但被高等法院裁定敗訴，兼要支付訟費。當大家以為陳浩天從此「收工」之際，原來佢未心息不特止，仲居然聯同其他地方嘅分裂分子「結盟」，仲大大聲咁話要「圍堵中國」，呢種行為等同出賣國家，實在要予以強烈譴責！

陳浩天要「圍堵中國」？

今次陳浩天同來自日本、台灣、內蒙古等地嘅獨派組織「結盟」，聲稱要「圍堵中國」，呢個講法令筆者諗起美國都曾經話過要喺亞太地區「圍堵中國」嘅政策。囍雨唔敢講陳浩天咁做嘅目的係要配合美國，但佢作為一個黃皮膚、黑頭髮嘅中國人，竟然同啲「外國勢力」一樣要「圍堵中國」、要中國「衰」，佢到底想點呢？咁唔鍾意中國，做乜仲要留喺中國香港生活呀？

事實上，以前陳浩天同香港其他獨派人士都試過去海外出席活動，宣傳「港獨」，企圖將「港獨」帶到國際層面。之不過人哋外國政客都唔係傻，支持「港獨」等同同中國作對，咁多年嚟只係得到一班唔入流嘅外國政客希望得到多啲曝光機會，所以同佢係咁易見下面。一句到尾，陳浩天係咁做大戲，其實都冇乜人睇佢哋台戲，名符其實係一場場自High嘅「獨腳戲」。

禁選立法會或阻嚇力不足

自從上次立法會換屆同今次補選，分別都有支持「港獨」同「自決」嘅參選人被DQ，本來已經令到啲盲反政客知道有啲政治底線唔可以踰越，唔敢再明目張膽支持「港獨」或「自決」；但諸如陳浩天之流成日喺香港、其他地方播「獨」，政府或者執法部門，係咪真係完全無佢哋符，要由得佢哋分裂國家呢？現行《刑事罪行條例》入面有關叛亂等罪行，真係唔可以用嚟懲治煽動叛亂嘅人？見到有班人成日喺度肆無忌憚咁播「獨」而「得個睇字」，唔可以進一步阻止佢哋破壞香港，其實都幾無奈下！

原圖：RTHK