仲有兩日就係立法會補選投票日，唔同嘅候選人都扭盡六壬作「最後衝刺」，未做過立法會議員嘅sell自己幾有heart，做過立法會議員嘅就sell自己有咩政績。囍雨今日睇新聞，有報道話盲反派新界東候選人范國威竟然無恥到以「拉布」為戰績，聲稱自己四年來發言次數有近500次，意思即係話自己立法會議員任內不斷「拉布」！囍雨唔知班盲反派fans對范國威曾經瘋狂「拉布」有幾支持，但囍雨就覺得，以「拖延會議」（「拉布」）做賣點，其實真係有啲可笑，而相信呢一招亦只會呃到部份嘅人！

拉布當戰績　仲要好得戚

傳媒報道，范國威嘅宣傳單張以「四年來發言次數497次」為賣點，而范國威自己亦承認至少曾喺「三堆一爐」、新界東北前期撥款以及醫委會改革等重要利民政策同改革上「拉布」；「拉布」明明係做錯，但范國威為咗宣傳竟然捩橫折曲，接受訪問時仲懶係鎮定咁話自己「沒有猶豫而參與拉布，甚至企得最前」，睇嚟呢位前立會議員除咗「拉布」當戰績之外，態度仲要好得戚咁囉！

假為民 真搞事

范國威講起「拉布」時就一副「招積」樣，但大家又有冇諗過，佢呢項所謂「政績」，其實係同佢自己今次補選嘅政綱有矛盾呢？好似范國威近期曾公開要求，政府將公私營房屋比例調整為「七比三」，並透過改建校舍同政府建築物，作為過渡性房屋。囍雨用常理推斷，要增加公屋比例而又要令到私樓供應唔好太少，就有需要增加土地供應；既然范國威都會知要有土地供應，咁又做乜要喺新界東北前期撥款「拉布」？即係一邊話要搞好房屋，一邊又要拖垮土地房屋議案，等香港基層市民唔夠屋住？

或者范國威真係天真到以為只係用「棕地」、唔使開發新市鎮、唔需要填海，就可以完全解決房屋供應問題，如果真係咁的話，呢位候選人就真係太天真！曾經有智庫估計未來香港缺地幾千公頃，唔好話棕地定新界東北，基本上係所有可能選項都要考慮，范國威作為新界東候選人但反對新界東嘅建屋計劃，係咪變相阻住人「上車」、「上樓」！從政者好、政客好，要分辨好壞其實好簡單，市民只要睇清楚，到底佢哋真係真心為市民，定只係為政治利益而反對；諗得通呢啲問題，其實要支持邊個，真係顯而易見！

2018年立法會補選新界東選區候選人還包括黃成智、方國珊、陳玉娥、鄧家彪以及趙佩玉。

原圖：RTHK