立法會補選投票進入倒數階段，越近投票日，有啲候選人就出現越多醜聞，喺今次補選以曾經焚燒《基本法》而「出名」嘅區諾軒，噚日喺一個選舉論壇上面，面對其他候選人質詢，問佢仲會唔會燒《基本法》嘅時候，竟然話如果有需要，佢唔介意再做一次（燒《基本法》）。仲有仲有，區諾軒以前曾經加入「左翼組織」、但論壇又被踢爆疑似立場轉變，曾經公開唱歌侮辱新移民係「蝗蟲」，仲話要「殺滅」新移民添；又唔擁護《基本法》、又表裡不一立場飄忽，區諾軒仲有資格做立法會議員？唔好玩啦！

唔介意再燒《基本法》

噚日喺電台舉行嘅立法會補選香港島選區論壇，可以話係相當精彩，因為先有任亮憲不斷質問區諾軒，問佢有關「港獨」、自決嘅問題，再問區諾軒係咪燒過《基本法》，當區諾軒承認之後，任亮憲就質問佢仲會唔會再燒，「政治立場」清晰嘅區諾軒就話如果有啲抗爭係有需要做呢啲「行為」，佢唔介意再做一次（燒《基本法》）。區諾軒咁答法，對於佢係咪尊重或者擁護《基本法》，真係非常明顯。

畀任亮憲批評完之後，另一港島區候選人都忍唔住「參戰」，直指區諾軒曾經高唱歧視新來港人士嘅歌曲，首歌歌詞包括「城邦會戰勝歸來 … 誓殺滅蝗蟲全為愛」；原來區諾軒唔單似唔擁護《基本法》，仲要唱「港獨」、反內地、反新來港人士嘅歌曲，相當之「慷慨激昂」下喎！唔講唔知，區諾軒以往係標榜平等博愛嘅中大左翼組織成員，點知原來只係「扮博愛」，玩歧視、排斥、人身攻擊先係佢真面目，呢種人表裡不一，實在無資格從政。

曾表示「港獨」為選項

有見區諾軒「臭史」愈來愈多，有市民近期就公開要求DQ區諾軒嘅參選資格。法律上可唔可以呢？唔知道，不過就有一定道理，因為佢除咗燒過《基本法》之外，翻查網上資料，佢喺2016年5月嗰時仲曾喺訪問講過，「如果他日有自決，無法拒絕有『港獨』的選項」。綜合種種事實，區諾軒呢個燒過《基本法》、歧視內地同新移民、同「自決派」過從甚密同埋曾經講過無法拒絕「港獨」嘅政客，要相信佢唔係搞自決、「港獨」而係真誠擁護《基本法》，真係比較難令信服。

區諾軒日後嘅參政命運係點，囍雨就不得而知啦，但佢呢種疑似「自決派」如果入咗議會，會唔會好似其他激進本土、自決派咁一味搞事，拖垮議會呢？大家真係要拭目以待。

立法會補選香港島選區其他候選人還包括伍迪希。