參選立法會補選建築、測量、都市規劃及園境界功能界別補選嘅南區區議員司馬文，繼被傳媒揭發所住大宅有多處僭建後，再被傳媒踢爆原來涉嫌霸佔官地多年拒絕糾正。呢位參選人「其身不正」、拒絕糾正，本身已經極度離譜，誰不知近日為選舉作「最後衝刺」嘅佢，竟然厚面皮到話補選係專業人士對法治、民主嘅表態；嘩，講到大義凜然咁，好似自己冇做違法事咁喎，查實根據司馬文嘅講法，咪即係叫佢呢個建築、規劃相關界別嘅專業人士，唔好投票畀佢呢個僭建霸官地，擺明破壞法治嘅政客囉！

司馬文被質疑「講大話」　拒拆地台或釀危險

今日有傳媒報道，話司馬文被揭發有僭建同霸佔官地後，曾經企圖淡化事件，話涉事官地無納入租地範圍係因為同有關部門「達成共識」，但該媒體噚日收到政府部門回覆，指司馬文（或者同佢老婆）屋外嗰幅地面「有未經許可的照明裝置及地面鋪砌佔用政府土地」，已經發信畀司馬文要求對方移除裝置，地政處亦將喺有關土地上豎立警告板，以免再畀人佔用。單睇地政總署回覆，即係政府部都認定司馬文有佔用官地，咁「涉嫌」兩字抹走，變成「正式」佔用官地喇喎！嗱，冇屈佢架，係地政總署講架咋！

眾所周知，司馬文曾經以地台唔係佢起為理由，拒絕清拆地台，咁講法囍雨又有啲疑問喇。第一，個地台係司馬文夫婦起，定係上一手或者其他人起，都好難再追查，都唔知司馬文有冇講大話；第二，就算地台唔係司馬文夫婦起嘅，地磚、地燈佢哋好似認咗係佢哋起架喎，咁點解只拆地燈，唔拆番啲哋磚呢？地磚唔係僭建物？地磚冇重量唔會構成危險嘅咩？

事實上，有專業人士已經講過，司馬文屋企隔離個僭建地台，山坡下面就係公共停車場，呢個地台如果倒塌，對其他人會構成危險；司馬文作為一個公眾人物，仲要係參選建築測量界別嘅政客，佢係咪連公眾安全都唔顧先？講到底，如果司馬文真係講法治的話，一早就唔會僭建，更加唔會「正式」佔用官地啦！唔好話自己唔識呀，佢係立法會補選建築、測量、都市規劃及園境界功能界別候選人、佢老婆亦係政府規劃師，話唔知乜叫僭建同佔用官地？講笑咩！

僭建十年未處理　有不可告人之秘密嗎？

老老實實，其實司馬文僭建呢單嘢，發生咗接近十年都冇事，囍雨非常懷疑點解地政總署或者當區地政處而家先開始做嘢，仲要係「踢一踢先郁一郁」嗰隻？當中有冇咩不可告人嘅秘密，或者利益關係？遲遲唔執法同司馬文嘅區議員身份，或者同佢老婆公務員嘅身份又有冇關係？種種疑雲，司馬文夫婦甚至有關政府部門都應該解釋清楚！

2018年立法會補選建築、測量、都市規劃及園境界功能界別候選人還包括謝偉銓。