就快到3.11立法會補選投票日，各候選人為咗拉選票自然會「各出其謀」「谷票」、「催票」，但係出埋啲「陰招」、「嗱渣招」就唔okay囉，話說宣誓玩嘢嘅姚松炎空降西九可能地區工作欠奉，就大玩抹黑，不惜老屈其他人收受利益、貪腐，仲話要成立「民間ICAC」，踢爆各種貪腐行為咁話。姚松炎連基本事實都未搞清楚就立亂老屈人，仲敢扮正義使者、仲敢話要「重建廉潔」，笑死人咩？

為選舉 不惜老屈梁振英

囍雨今日喺街攞咗份姚松炎嘅宣傳單張，佢喺份宣傳品聲稱要「揭穿謊言，重建廉潔 … 」，不過當囍雨睇真啲份宣傳品，啲嘢錯到離晒譜，佢話「特首收受利益人盡皆知，竟可逍遙法外」，又係炒作UGL。好明顯，姚松炎同其他盲反派人士諸如民主黨林卓廷一樣，為咗政治私利，不惜亂屈梁振英抽爛水。

為免大話講一百次有人當真，囍雨梗係要Recap一下「UGL事件」啦。涉及「UGL事件」份協議，其實只係一份由律師草擬、各方持份者都支持同知情嘅普通「離職協議」。CY簽約嘅時候，並唔係戴德梁行董事、並未宣布參選特首，更加並冇公職在身，加上率先報道事件嘅澳洲媒體亦證明事件中各持份者，包括UGL、梁振英舊老闆DTZ董事局、以及債權人銀行等全部都清楚協議內容，姚松炎話CY「暗地收受UGL」錢，根本就同事實不符，係抹黑、係誣衊同誹謗！姚松炎作為立法會選舉參選人，喺宣傳品上面話某人涉貪，係唔係都應該攞出證據，唔好喺度「隨幻覺隨動作」去搞人格謀殺呢？

至於「重建廉潔」，囍雨真心拜託姚博士去睇睇國際評級機構點講香港先啦，你作為學者，到底又憑乜去質疑呢類評級機構話香港「廉潔程度極高」嘅結論先？遠嘅唔講，國際知名反貪機構「透明國際」上個月尾先至話香港喺「全球廉潔指數」排名上升，透明國際主席更加講到明，香港表現好好，係極佳反貪伙伴，咁到底姚松炎想「重建」乜先？行開啦。

「專業議政」得啖笑

除此之外，囍雨見到姚松炎喺份宣傳品度自稱係「以專業議政」，真係得啖笑。囍雨仲記得，姚松炎曾經講過2047年係香港土地大限，質疑啲地係咪一定會自動續租、地租有冇機會係1000%、變相補足地價等等，搞到時作發展局局長都要澄清，話已經有土地個案係酌情免補地價，只係交差餉租值嘅3%；另一個例子，就係姚松炎涉嫌老屈地政總署改變合作社補價方式，搞到啲合作社重建唔到，結果政府又發聲明，話政府根本冇改過補地價方式。所以與其話姚松炎係「專業議政」，不如話佢係「專『屈』議政」仲好啦！

以「屈人」、「抽水」嚟招徠選民，唔單有失專業，更加係有違人格，講到尾都係為自己，咁嘅政客，如果再入議會，會為民眾做實事？我唔信囉！

立法會補選九龍西候選人還包括鄭泳舜、蔡東洲。 

原圖：takungpao