特首林鄭月娥噚日見記者，講到而家立法會民生等議案進程時表示好沮喪，話有好多議案仲未通過到；咁啱喺同一日，建造業就有成3,000人遊行「反拉布」，有工人更表示工程撥款受阻，自己已經半年冇工開！雖然立法會大會同財委會都已經通過咗議事規則或者程序修訂，大大壓縮咗盲反派「拉布害民生」空間，但如果大家認為「拉布」之禍已經消失，咁就真係太天真喇，因為今日法院裁決，《立法會（權力及特權）條例》不適用於立法會議員，盲反派有咗呢條法律罅，未來一定會用盡其他方法去癱瘓議會啫！

過千億工程未通過

根據公開資料，上個立法年度立法會工務小組本來已經通過大約1,300億元撥款，但最終由財委會通過既撥款連一半都冇，只係大約580億左右。去到今個立法會年度，情況一樣咁惡劣，政府提交嘅議案大約涉及2,000億元撥款，但財委會至今大約只係700幾億；最慘嘅係，呢啲未通過或者連立法會都未擺到上去嘅好多都係民生工程，例如新市鎮擴充或者大家都極關心嘅重建醫院撥款，林太話自己「沮喪」，真係唔係冇理由囉。

議事規則還有漏洞

的確，雖然立法會已經通過修改議事規則，而財委會亦已經通過修改議事程序，但「拉布」問題始終未能杜絕，因為盲反派仲有一招可以用，就係衝擊、霸佔主席台、自製混亂令到主席不得意宣布「休會」。係囉，咪就係好似台灣立法院咁囉，盲反派去到關鍵時刻，只要當中幾件衝出主席台，搞衝擊、玩佔領，咁立法會或者委員會主席好多時就要被迫「休會」，盲反派到時就會成功「拉布」。

大家睇新聞都見到台灣立法院有幾亂架啦，呢啲場面相信唔使囍雨多解釋，大家都會明白！囍雨尊重法治，當然亦尊重法庭判決，法庭今日喺「長毛」梁國雄搶文件案上面，裁定「特權法」相關法例唔適用於立法會議員，即係班盲反派議員只要冇干犯襲擊等刑事罪行，就算玩衝擊現行法例都奈佢哋唔何；以上係客觀陳述，盲反派成功鑽研到呢個法例漏洞，只可以話係香港嘅不幸。

要用民意壓倒盲反派

當然，呢單案仲未完結，政府仲有機會上訴，只要勝訴的話，「拉布」問題就可以解決。當然，法律還法律，要阻止盲反派議員再亂嚟，終究要靠民意，靠市民用選票向盲反派同「拉布」說不。仲有幾日就係立法會補選投票日，呢場既係一場補選，亦係市民要建設定係要破壞嘅表態；如果再選到破壞派人士入立法會，最終受害嘅，都係香港市民！

原圖：wenweipo