財爺陳茂波噚日發表今屆政府第一份《財政預算案》，雖然陳茂波無直接人人派錢，有人因此係咁批評陳茂波，但廣男覺得呢份都算係一份四平八穩嘅《財政預算案》，起碼向中產、貧窮人士同老人家「派糖」之餘，又有做好創科發展、興建醫院等社會投資。不過，廣男作為一個深受「貴租」之苦困擾嘅租客，如果財爺宣布埋租金都可以扣稅，咁就Perfect喇！

昂貴租金 折騰市民

如果可以買到樓「上車」，咁當然唔需要租金扣稅啦，但問題嘅癥結，在於而家啲樓價貴絕全球，正常打工仔尤其係年輕人，如果冇家人資助根本就好難買到樓，就算勉強畀到首期上到車，供樓都相當之吃力。退而求其次，只好租樓住住先，等「時機一到」，再考慮係咪上市買樓。

租金應該要退稅

但係而家啲租金其實一樣好貴，唔計港島、九龍，好多新界兩房單位閒閒哋都要萬幾蚊租金，如果唔係太高收入嘅人，交咗租、畀埋家用同扣除日常開支，其實又好難儲到錢買樓喎！所以呢，廣男覺得如果租金都可以扣稅，都可以減輕下我哋呢啲「邊緣中產」嘅負擔。老實講，租樓住感覺就好似幫業主供緊樓咁，如果業主供樓嘅利息可以扣稅，咁我哋呢啲租客畀左租金但乜都冇，係咪都應該幫下我哋呢？

根據財爺陳茂波嘅講法，因為研究租金扣稅仲有好多細節要考慮，例如要調整稅務局電腦系統，而且據講今年嘅稅單都已經印好咗，所以今年要租金退稅都好難架喇！不過，由於喺未來三、五年，廣男相信自己都未必有能力上車，所以就算政府係研究完下年先推出租金扣稅嘅措施，廣男都一樣咁歡迎。可以想像下，喺而家高樓價、高租金嘅環境下，如果扣晒所有開支仲要交咁多稅，個人就算本身唔係大花筒，其實都好易變做「月光族」，都幾「陰公豬」架！

原圖：takungpao