想知乜係本末倒置，睇《毒果》啦！想睇乜叫敗壞社會風氣，睇《毒果》啦！想知乜叫不分是非黑白，只求攻擊政敵，睇《毒果》啦！

尋日特首梁振英出席立法會答問大會畀人掟玻璃杯，由於事態嚴重，特首辦公室事後報警處理。今日嗰壹個傳媒旗下既《毒果》竟然夠膽死話梁振英「踐踏」立法會尊嚴喎，Come on，踐乜踏呀？疑似畀人襲擊都唔可以報警，唔係啩？

立法會唔係三不管地帶　警察有權進入調查

講返少少背景資料先，以免大家睇唔明囍雨講乜，又或早畀《毒果》呀、《煮梁新聞》等等呃咗。立法會「並唔係」一個三不管地帶，喺香港法例下，如果立法會大樓範圍發生刑事罪行，警方絕對有權入內調查，要得到立法會主席同意先進入，係基於尊重，基本上只係憲制慣例，OK？

特首辦尋日報警後，重案組探員去到立法會大樓調查，係立法會保安員容許警員進入，並唔係警員夾硬入去，雖然保安無通知到立法會主席或者秘書長，但咁唔代表係梁振英踐踏立法會尊嚴喎！尊乜嚴呀，有議員開會時掟玻璃杯呀！係玻璃杯呀，掟中會頭破血流，甚至死人架！傻的嗎？

忍咗兩年　到掟玻璃杯先報警　咁叫無量度？

咁仲唔夠，尋日特首辦報警後，竟然有泛民議員話梁振英「小器」、「冇量度」等等，囍雨真心想問一句：到底你班人知唔知自己講乜呀？梁振英上台兩年，激進派議員就掟嘢掟足兩年、講粗口同惡嚇政府官員兩年，官員有冇報警呀？有冇追究呀？冇囉，咪就係冇囉，所以咪搞到激進派變本加厲囉！

作為政府領導人，除咗施政同為香港拼經濟外，最重要係保持社會既良好風氣。動不動就掟嘢、郁手，如果咁都唔報警，係咪即係默許社會上存在暴力？咁同鼓勵市民用暴力達到一己訴求有咩分別？Sorry囉，我係保守，我覺得等警方去查已經係最文明同最好既安排，咩事先，而家梁振英又唔係行私刑，有幾冇量度呀？有幾冇器量呀？

未有民主就可以變做Sin City？

仲有呀，煩，都要講多次，今次掟既係玻璃杯，唔係紙星星、唔係陰司紙、唔係香蕉咁簡單！幾年前掟第一隻蕉開始，暴力抗爭既風氣不斷蔓延，呢股歪風唔止吹去政治方面架，唔少市民耳濡目染，都會誤會暴力只係尋常事，久而久之，個個都用暴力解決問題。

大家撫心自問，係唔係想香港咁？係唔係冇民主，香港就可以變成罪惡之城 (Sin City)先？民主唔係咁爭取架，用呢種手法畀你爭到，最後都係畀人用「暴力」推返你落台架咋！不解釋，自己諗唔該。