由於正值農曆新年、又臨近立法會補選，社會有一排無乜講過嘅高地「一地兩檢」方案，隨住一班立法會議員噚日視察西九龍高鐵站，又開始有人熾熱起嚟。其實，囍雨一早都同朋友講，話盲反派班人去視察西九站，美其名視察，實則就係雞蛋裡挑骨頭，點知真係一語成讖，一地兩檢關注組召集人、公民黨立會議員陳淑莊話中港口岸之間好多「暗門相通」，質疑有關通道係「隨意門」，為中港邊界打開缺口咁話。咁嚴重嘅指控，搞到保安局局長林李家超都即刻駁斥，話果啲門有上鎖、有CCTV，根本就唔係咩「隨意門」！

隨意詆譭、製造恐慌

嘩嘩，真係好「隨意」噏得就噏，陳淑莊有門就係「隨意門」，咁我哋屋企咪好恐怖？其實門可以上鎖、可以加裝CCTV拍攝，仲有警報系統，最緊要係做好監管制度，有人濫用、有人亂闖，就施以合法懲處。陳淑莊同盲反派無非係想暗示內地執法人員可能跨境拉人，製造恐慌囉！

記得政府公布「一地兩檢」三步走前後，盲反派為咗反「一地兩檢」幾乎係無所不用其極，最誇張嘅講法就係話市民如果行近西九高鐵站，分分鐘都可能畀人捉入去；今次佢哋提出「隨意門」嘅新講法，其實只係為舊招數包上一層「新包裝」，等香港人同佢哋一齊反「一地兩檢」。不過，綜觀民意以至大學調查，市民似乎都係較支持「一地兩檢」，原因囍雨相信係因為市民明白「一地兩檢」始終都係民生措施，唔少市民亦都明白，盲反派嘅炒作或者抹黑，係有政治目的嘅。

侮辱本港及內地執法人員

諗真啲，其實盲反派呢種講法，唔單只係攻訐內地、內地執法人員，而係本港嘅執法人員都畀佢哋侮辱埋，如果中港口岸區之間有通道，而係有CCTV、警報果隻，盲反派有意無意話係「中港邊界缺口」，除咗係指控內地之外，根本就係指控緊香港執法人員違法放內地執法人員入嚟，對香港專業嘅執法人員作出咁無理指控，盲反派唔通真係為盲反，可以做到咁喪心病狂？

「水能載舟，亦能覆舟」，盲反派喺高鐵、「一地兩檢」問題上堅決逆民意而行，佢哋鋪鋪都唔理民意，囍雨認為，遲早有一次，市民統統都離棄佢哋，令佢哋付出沉重代價。 

原圖：政府新聞網