財爺陳茂波後日就會發表今屆政府第一份《財政預算案》，對於政府本年度有大量盈餘、庫房「水浸」基本上就好多人都知架喇，所以今年《財政預算案》嘅最Hot Topic，就係政府點樣「派糖」、「還富於民」。而家社會好多人都叫政府直接派錢，仲要係每人派唔少於5000蚊現金。用「人人有份」嘅方式派錢，梗係好多人都會開心啦，不過囍雨就唔係好贊成呢種「還富於民」嘅方式，因為公帑運用或者「財富再分配」嘅原則，根本就應該將資源集中喺最有需要嘅人身上！

派錢令資源運用不當

對於某啲社會人士嚟講，直接派錢梗係吸引啦，但係囍雨覺得，派錢其實唔太恰當。對於富有階層而言，幾千蚊根本冇乜用；對於中產，尤其係供緊樓、租緊貴樓仲要交緊稅果啲而言，幾千蚊其實幫助不大；而對於部分青年嚟講、果幾千蚊多數都係用嚟「消費」；對於其他基層、貧窮人士，幾千蚊可能極度有用。既然如此，係咪應該將資源集中喺最有需要嘅人身上呢？

老實講，囍雨絕對贊成政府透過財富再分配例如幫助基層或者貧窮人士，但直接派錢嘅方式唔單只唔夠聚焦，而且會令相當大金額嘅公帑運作失宜；而作為一個納稅人，囍雨認為除咗基層之外，中產人士一樣係苦不堪言。有樓嘅中產好多每個月都要攞部分人工去供樓，冇樓嘅就要交租「幫人供樓」，而且仲要係一路交稅果隻，如果政府要喺《財政預算案》幫助有需要人士，一定唔可以忽略中產嘅訴求。

認清貧窮問題

當政府以至唔同陣營嘅從政者都要政府「派糖」或者「還富於民」，紓緩貧窮問題嘅時候，囍雨覺得大家真係要諗下兩個致貧嘅主因。第一，係差唔多全民就業嘅情況下，好多人唔係因為無工做而無錢，而係因為要交貴租或者供貴樓而搞到冇乜錢剩。第二，人口老化又係另一個大問題，好多基層打工仔一退休之後就跌入「貧窮線」，強積金或者儲蓄根本支撐唔到佢哋嘅日常開支。如果政府預算要更到位咁幫到基層、老人以至受盡「貴租之苦」嘅中產，好應該由呢個房屋同人口老化呢兩個方向多做工夫。總的來說，囍雨就係唔贊成「一炮過」、無助解決貧窮問題嘅派錢方法！

原圖：財政司司長辦公屋網頁