最近國際反貪組織「透明國際」公布2017年全球廉潔指數，香港得分維持一樣分數，排名比前年上升兩位，即係根據有關指數，香港廉潔程度冇變，喺全球維持一個高水平。囍雨認為，呢個廉潔指數唔變，正正大力摑咗班盲反派一巴掌，因為呢班人一直喺度借唔同事件抹黑官員、前官員、建制人士甚至廉政公署，而家國際組織話香港廉潔不變，教佢哋情何以堪呢？最諷刺嘅係，政棍林卓廷仲好意思話「難以理解」廉潔指數冇變；咁講法，即係話自己唔明點解唱衰廉潔指數失敗嗎？

政客抹黑 才是影響市民觀感關鍵

對於今次「透明國際」嘅調查結果，廉署就表示歡迎；不過，班盲反派政客唱衰廉潔失敗，就好似唔係咁開心喎！好似專做「廉署Beat」嘅民主黨立法會議員林卓廷咁，佢就聲稱廉潔指數同香港人認知有差距，話近年政府高官屢被揭發涉貪，前特首梁振英UGL案仲查緊等等，又提到廉署嘅人事事件，揚言呢啲都影響市民對廉潔觀感。

事實上，無論係UGL事件，抑或係廉署李寶蘭署任事件，大家由頭到尾都唔覺有Case，由始至終都係班盲反派政客一廂情願炒作事件，當中最用力嘅其中一個，就係為搏出位、搶Focus嘅林卓廷。囍雨真係要問下林卓廷，UGL作為一個各方知情、參與嘅「離職協議」，請問邊度係「非法回佣」？CY果時唔係UGL董事又未選特首，又加上「不可有利益衝突」條款，請問邊度係「非法接受利益」？至於廉署李寶蘭署任嘅問題，由頭到尾都係得林卓廷自己喺度講，完全無證據；與其話市民對廉潔觀感唔係咁，不如話林卓廷班人係咁抹黑香港廉潔，但「無功而回」！

林卓廷紀綠差 信唔過

老老實實，囍雨一向對林卓廷呢個政客好有保留，好似果時民主黨發生「釘書健」事件，林卓廷同埋其他民主黨元老一齊出嚟同林子健開記者會，言之鑿鑿話林子健畀內地人捉走咗，仲要用釘書釘大髀果隻！之後林子健被踢爆、質疑「作故仔」，林卓廷有份屈人有出過聲、有道過歉？梗係冇啦，有彩佢就識攞，有鑊喇喎，佢作為一個「高明政客」梗係閃啦！引用親人當中一位小朋友成日講嘅說話，仲信林卓廷？「你傻豬嚟嘅咩？！」

原圖：RTHK