農曆新年期間，除咗外出拜年外，囍雨最鍾意嘅節目就係舒舒服服、安在家中睇電視。日前睇到電視播放一套名為《網戰》嘅電視劇，內容提到喺網絡年代，有組織專門透過處理、發布各種資訊，影響網民思想同輿論，甚至攻擊敵人，至死方休。一睇這套電視劇，囍雨即刻諗起今日香港，喺呢個「抽水為上」、「搶佔道德光環」嘅年代，公眾人物、從政者，全部都會可能成為網絡欺凌受害者，真係慘慘豬！

「網戰」無處不在

《網戰》講咩呢？主要係講述互聯網世界充斥「未審先判」、「盲撐盲反」同埋「製造謠言」等情況，更有類近「情報機關」嘅組織不停發布各種資訊，利用抹黑手段幫「老闆」攻擊其他商業敵人；另一方面，有「五毛」自然有「反五毛」，即係專門協助受害者解決麻煩嘅網上打手陣營。驟眼睇落去，感覺有啲似現實中香港嘅盲反派同本土陣營，眾所周知，盲反派喺網絡上影響力要比建制派大得多，甚至可以形容為「無遠弗屆」，盲反派同本土派操控住建制派政治人物，甚至政府官員嘅網絡形象，只要佢哋決定攻擊，唔理你幾多道理都好，一樣好難翻身，情況就好似涉及前特首梁振英嘅「UGL事件」咁。

「UGL事件」曝光已經接近四年，當中唔少謬誤明明已經澄清同解釋晒，但由於盲反派傳媒、政客同網軍對所有回應都置之不理，結果喺今日「大話講一千次都會變真」嘅香港，一堆老屈老作嘅指控仍然係網上嘅主流。好似到今日仍然有人話梁振英係「收回佣」、收取「黃金握手」費時冇通知當時老闆等等，大佬呀，UGL自己發嘅聲明，以及率先報道事件嗰個澳洲傳媒自己都有報道啦，事件中所有持份者，包括賣家蘇格蘭銀行、戴德梁行管理層等等，全部清楚知道協議內容，咁又何來「收回佣」呀？可惜，呢啲事實，喺網絡世界仍然唔係主流，真係好可惜。

抹黑他人是一台戲

其實，班盲反派好似公民黨梁家傑、楊岳橋、民主黨林卓廷、會計界梁繼昌，同埋所謂法律學者張達明咁，得閒就拎「UGL事件」出嚟翻炒一番，一句到尾咪就係「人格謀殺」之嘛！一直以嚟，就算明知「UGL事件」嘅實情都好，佢哋都會因為政治利益而「夾硬砌」梁振英。對唔係，粗俗啲都要講：真係好可恥呀！

各位讀者，喺呢個資訊爆炸年代，最重要係識得自行發掘真相，下下從單一渠道拎料，肯定會畀人呃。你唔一定要信晒囍雨，但希望你哋至少都睇睇本人辛辛苦苦搵返嚟嘅資料，全部都有出處、唔係亂吹水，若然大家堅持「政治凌駕理智」嘅話，咁囍雨亦只好引用《網戰》一句對白，「長遠下去，道德必定淪亡」！

原圖：TVB、RTHK