近年智能手機興起，喺三星同蘋果手機穩佔部分份額嘅市場上，中國有唔少手機製造商好似華為、小米咁，已經悄悄崛起，不斷增加市場佔有率，其中華為手機更加係全球手機出貨量僅次於三星同蘋果嘅全球第三大手機製造商，都咪話唔犀利。正所謂槍打出頭鳥，美國對於中國嘅手機都好似有啲戒心喎，有傳媒報道美國中情局、聯邦調查局等情報機構，就向美國參議院提交報告，話基於安全理由唔建議美國人用中國智能手機商華為同中興嘅產品。廣男就非常質疑，到底係中國手機產生安全風險，定係有人想保護美國市場先？

中國手機影響美國市場

老實講，美國啲情報機構話唔建議用中國生產嘅智能手機，廣男第一時間嘅反應，唔係咩安全理由，而係美國想實行「保護主義」，喺美國本土市場排除中國嘅手機。呢個說法唔係無的放矢，早排美國總統特朗普先至簽署命令，要大幅增加太陽能面板同洗衣機嘅入口關稅，特朗普自己亦承認呢一招係要保障美國企業利益，咁咪即係「保護主義」囉！講返手機，係人都知中國生產嘅手機性價比高，如果用類近規格嘅手機作比較，中國生產嘅手機價格，可以畀美國生產嘅手機平成倍甚至有多，如果中國手機進入美國市場而又開始普及，最影響到嘅除咗係三星手機，就一定係美國品牌例如蘋果嘅手機。

至於中國手機產生安全問題，廣男雖然唔算係好頂尖嘅科技專家或者KOL，但美國情報機構呢個「指控」其實好難成立。假設華為有部手機要進入美國市場，以美國政府、情報機構甚至手機營運商嘅科技水平，會唔會check唔到中國手機有冇間諜軟件或者硬件呢？其實可能性好低囉，與其話中國手機有安全風險，不如話美國情報機構別用用心仲好啦！

要禁美國手機在中國發售嗎？

如果美國啲情報機構話中國手機有安全問題，建議美國人唔好使用呢個邏輯係講得通嘅，調番轉嚟講美國手機又有冇安全風險呢？其實，全球化或者全球自由市場，就係要畀商品喺低關稅或者零關稅嘅情況之下全球流通，美國既然擁抱資本主義、自由市場，就應該開放啲啦！除非佢哋對自己國家嘅產品無信心啫，否則中國手機？Yo，駛乜驚呀？

原圖：新華社