南韓平昌冬奧正進行得如火如荼，外界對冬奧其中一樣最關注嘅，除咗運動員競逐獎項嘅新聞，北韓代表團到訪平昌冬奧消息亦獲得大篇幅報道；廣男作為一個男人，除咗將注意力集中喺北韓班美女啦啦隊身上之外，查實都有留意關於兩韓嘅新聞。其實兩韓喺今次冬奧排除一啲外國阻力「破冰」，點都係一件好事，有評論就認為南北韓係今次冬奧嘅「外交贏家」；亦有人分析，話北韓咁做係要離間南韓同美國嘅關係。其實，南北韓好似先至係一家人喎，乜一家人團結起嚟反而會離間到同外人嘅關係咁得意？

美日欲影響兩韓關係

其實，今次南北韓罕有地喺冬奧見面、交流，本來已經係一件相當難得嘅事，喺全球都鼓吹和平嘅思潮下，試問又有乜理由唔畀兩韓正常交流呢？不過，美國同日本就好似唔係咁樂見其成咁，據報一時又話要向南韓施壓，一時又話要敦促南韓盡快恢復軍演。咁玩法，明顯係想兩韓關係繼續「結冰」，等美、日有理由介入亞洲其他國家嘅事務。

一個更有趣嘅說法，就係有分析指北韓領導人金正恩係想離間美韓關係，南韓唔應該畀北韓玩弄於股掌之中。對於呢個講法，廣男就覺得有啲可笑喇，南韓、北韓兩個同宗同源嘅國家，其實本來就係一家人，相反美國位於美洲，本身距離北韓足足一萬公里以上，加上日本亦唔係位於朝鮮半島，佢兩個係外人先至啱喎，試問又邊度有一家人離間同外人嘅關係呢？調番轉嚟講，應該係有外人想離間兩韓先真。

兩韓關係仍有變數

無論點都好，廣男都贊成兩韓繼續朝住良好方向發展，唔好因為其他國家干預就擺出一副戰鬥格。不過老實講，兩韓關係依然係暗湧處處，就算而家南韓願意伸出橄欖枝，如果美國一定要南韓Keep住做軍事演習，加強對北韓施壓或者制裁，咁北韓會點呢？又或者，如果喺「朝鮮無核化」嘅國際共識上北韓仲要核試，美國同南韓又會有咩反應呢？呢啲全部都係未知之數，唯一肯定嘅，就係無論事情朝向邊個方向發展都好，美國呢個「世界警察」都會繼續「發揮」佢哋嘅好角色。

原圖：新華社