今時今日，社交媒體嘅普及程度越嚟越高，仲要有唔少人日日甚至係時時刻刻嘅生活都離唔開社交媒體；好似廣男咁，每日最少都會上Facebook四、五次，既睇下親朋戚友有咩新動態，亦會利用Facebook睇下唔同新聞。今日廣男睇新聞，見到有報道話Facebook正喺度測試一個名為Downvote（暫譯為「踩」）嘅負評按鈕，用戶按咗呢個「踩」按鈕之後，仲會出現「冒犯」、「誤導」以及「離題」等選項，畀用戶解釋畀負評嘅原因，據報仲會令有關唔受歡迎嘅內容「沉底」。呢個功能有冇效呢，試過先知，但廣男認為Facebook嘅根本問題係在於用戶接收資訊太單一，用家睇極都係類似立場同內容資訊，好容易出現「圍爐取暖」嘅負面效果。

Facebook容易造成「圍爐取暖」效果

喺大約一個月前，Facebook宣布將會改革「動態消息」（News Feed）排序方法，將親友帖文等「有意義」嘅內容擺前啲等用戶多啲機會見到，而傳媒、商業機構發布嘅非廣告資訊就會相對排番後啲，用意係令Faceook呢個社交網絡可以令用家聯繫多啲自己關心嘅人，同埋鞏固用戶喺現實世界嘅社交圈子。無論係改革「動態消息」抑或測增加負評功能，廣男認為都值得研究同討論，不過Facebook終極問題始終係，如果冇辦法改善用戶接收資訊單一、容易令用戶「圍爐取暖」呢一種問題，咁點改革都只係小修小補。

舉個例子，今日網上媒體、尤其係社交媒體嘅資訊雖然多到「爆炸」，用Facebook用戶隨機睇到嘅內容其實仍然非常單一，呢種設計原意係，想畀用戶睇到更多自己關心同認同嘅話題，從而令用戶增加投入感同互動。冇錯，如果Facebook只係純粹「興趣組群」或者「同好會」，呢種設計當然可取啦，但正如Facebook自己都知，佢哋可以分享「新聞」同「時事」內容嘛，咁就唔同咁講法喇。

社交媒體為「雙面刃」

舉個極端例子，如果有某個用戶，佢係立場激進兼支持用暴力勇武抗爭嘅人，咁佢平時讚好、追蹤嘅社交平台，喺今Facebook設定下，佢每日睇到、見到、聽到嘅，都會係同一種激進主張嘅言論；另一方面，假如佢嘅Facebook朋友大部分都係同佢有類近主張，咁好可能意味呢個網民「日睇夜睇」嘅，其實都係呢啲要抗爭、「反政府」嘅訊息，咁樣亦都較容易製造出仇恨、煽動輿論，當中甚至有恐怖主義都唔出奇！對於呢個大難題，廣男唔知Facebook有冇辦法解決呢？

所以呢，廣男就覺得社交媒體根本就係一把「雙面刃」，一方面佢可以拉近人同人之間嘅距離，但另一方面可能又會令到人同現實社會、氛圍嘅距離「拉遠」；如果Facebook真係有決心要改革，到底點樣令到人「選擇性」接收資訊嘅時候都可以平衡番啲，其實都仲係一個大難題。

原圖：Facebook網站截圖