「雙學三人」就衝擊政總案上訴到終審法院獲判不必坐監，但終院並同時講明，上訴庭為將來案件作出判刑指引合理，以後再有衝擊政總、「佔中」等情況，判監基本上係必然。本來法庭頒布決定、以正視聽係非常合理嘅事，但盲反派偏偏有啲別有用心嘅人就連法庭都攻擊埋一份。好似港大嗰個所謂「法律學者」戴耀廷咁，竟然話「抗爭者不用假設法院必然站在你的一方，尤其是對威權下的法院。若深信是公義的，就勇敢去做」；言下之意，即係繼攻訐政府係「威權」之後，戴耀廷連法庭誣蔑埋。喺呢度，囍雨有三大問題必須要問清楚戴耀廷！

第一問：咩叫做「威權下的法院」？戴耀廷咁講係想話法庭畀政府干預？定係話法院係「威權」政府一部份？定係想話法庭同政府合作，所以判決係「唔公義」？

第二問：法庭今次審理「雙學三人」案，裁決雖然有爭議，但總算係依法辦事，而且係緊跟香港一直推行嘅「普通法」原則；如果法院連講明示威、集會都要和平、非暴力，戴耀廷都要唔滿意，咁法庭係咪要話「公民抗命」就做乜都得呢？戴耀廷呢啲所謂「法律學者」唔係捩橫折曲咩？

第三問：戴耀廷身為「法律學者」，應該好清楚知道大家可以理性討論甚至批評法庭判決，但如果係刻意「唱紅抹黑」、攻訐法庭「有政治考慮」，呢啲行為好可能已經屬於「藐視法庭」，而家戴耀廷講到明法院係「威權下的法院」，明示暗示法庭判決唔公義，算唔算係「藐視法庭」？

法治社會 不會向政客屈服

老實講，囍雨覺得戴耀廷根本係披住「法律學者」嘅外衣，而專門破壞法治、司法系統嘅政客；大家唔好唔記得佢另有其他身份，包括：「違法佔領」發起人、「違法達義」提倡人，以及因違法佔領被控嘅「佔領九疑犯」之一。如果戴耀廷真係有承擔，根本應該坦承認罪，承擔自己喺「違法佔領」期間嘅罪責，而絕對唔係喺度抹黑政府、法庭！如果執法、司法部門會因為有政客唔鍾意而有所妥協，咁香港就真係係法治淪亡喇！

原圖：takungpao