南韓平昌冬奧就嚟揭幕，外界非常關注嘅北韓落實由名義上「國家元首」金永南率領代表團參加，而據報，佢仲話會同南韓總統文在寅會面。喺兩韓關係好似有好轉之際，美國似乎就對兩韓和好「大撥冷水」，除咗副總彭斯話唔可以畀平壤騎劫冬奧之外，美國、日本都會牽制文在寅行緊嘅對話路線，仲會敦促盡快恢復美韓軍演等等。所以呢，兩韓關係雖然表現上有改善，但依然係乍暖還寒；就算兩韓各自釋出善意都好，美國又點會畀佢哋太friend呢？

美日聯手 向南韓施壓

彭斯今次出邊韓國參加冬奧揭幕之前，選擇先到訪日本呢個「大盟友」；據報，日本首相安倍晉三同彭斯會面時，將會發表美日聯合文件，主要係雙方加強對南韓施壓，要加強美日韓三方合作，牽制文在寅嘅對話路線喎！心寒？未算呀，據講美日仲會敦促南韓盡快恢復「美韓軍演」。明知北韓對美韓軍演極敏感，日本都要堅持咁做，講到底，都係為咗自己政治利益。朝鮮半島唔亂，美國又邊有藉口介入亞洲事務、日本又有咩藉口去修憲擴軍呀？

講真，美國憎恨北韓，基本上係全世界都知，但如果你問廣男，廣男就覺得美國未免太霸道喇。當北韓態度強硬嘅時候，美國總統特朗普甚至話自己果粒「核按鈕」仲大粒，講到可以隨時炸咗北韓咁；好啦，而家北韓方面伸出友誼之手，願意同南韓一同參與平昌冬奧，美國同日本又唔畀兩韓關係打番好，仲要叫南韓恢復軍演，迫南韓同佢哋一齊擺出「戰鬥格」。都係嗰世，美國根本唔想世界和平，因為愈亂，佢國家班軍火商先會搵得愈多錢。

美國黑手處處

見到兩韓嘅時局發展，就令廣男諗番起美國點樣對待中國同香港，特朗普早排發表任內第一份國情諮文，先至提出「中國威脅論」，連中國和平崛起都好似想唔畀咁；跟住喺本港「雙學三人」明明係犯法仲要係涉及暴力果隻，美國又有12個國會議員要提名佢哋攞諾貝爾和平獎，擺明借捧高香港啲盲反派嚟搞中國，司馬昭之心，相信只有盲反派先至見唔到。

老實講，北韓積極參與平昌冬奧係咪有咩陰謀，廣男梗係唔知啦，但觀乎美國對北韓以至世界各地嘅一舉一動，佢哋根本就唔係咩「世界警察」，而係到處挑起火頭從中獲取政治利益，或者鞏固自己霸主地位嘅「攞正牌」流氓至真！

原圖：xinhuanet