廣男最近睇緊本關於美國企業家馬斯克（Elon Musk）嘅書，本書講佢點樣排除萬難創辦電動汽車Tesla同火箭公司Space X嘅奪鬥史。呢本書睇到廣男如癡如醉，因為素有「現實版鋼鐵人」之稱嘅馬斯克，為咗追夢同完成佢有關汽車、火箭、移居火星嘅計劃，就算將成副身家用晒都在所不惜，最終都係通過難關，都咪話唔勵志。唔講唔知，書入面仲提到，馬斯克認為喺航空科技方面，中國將會係美國嘅一大競爭對手；說時遲、那時快，廣男近日睇新聞就見到中國首個私人衛星成功發射，唔通中國真係可以成為航天大國？

中國可成航天大國

講返本書先，馬斯克喺書中談及航天事業嘅時候，曾經講過喺航天科技方面，中國將會係其中一個主要對手，原因係中國喺發射火箭方面成本較低，頗有能力挑戰其他航天公司。其實，之前已經有美國媒體報道過，未來中國可能會成為主要嘅航天大國，因為未來嘅中國運載火箭可以「重複使用」，甚至會發展可重複使用嘅航天飛機、核動力飛船等等。

查實國務院新聞辦公室2016年已經發表過中國航天白皮書，裡面亦說明咗中國航天科技未來發展路向。當時中央政府已經話，要盡快完成載人航天、月球探測同北斗導航等項目，目的係為「一帶一路」沿線國家提供衞星導航服務，而除咗一路做開嘅探月工程外，國家亦計劃喺2020年發射首個火星探測器，用嚟研究太陽系起源、演化、探尋外太空生命等科學問題。

發展軍民兩用航天事業

不過最難得嘅係，直到今時今日，中國發展航天事業會仍然可以堅持和平同開放原則，發起航天事業，絕對唔係為咗搞太空軍備競賽。返去最近個報道，中國首個私人衛星成功發射，意咪住中國航天事業發展真係唔係單純軍事用途，航天事業發展除咗國家、科學家、企業家可以受惠外，當私人衛星發展成熟，肯定就可以創造大量商機同服務，只要分配得宜，一般民眾肯定可以從中受惠。

當然，軍事用途、保家衛國呢啲任務亦唔可以荒廢，中國近年已經完成運載火箭及人造衞星軌道調整技術，呢項技術同「彈道導彈彈頭可變軌」技術息息相關，亦係突破美國國家彈道導彈防禦技術嘅重要手段，將來甚至會係「反衞星武器」嘅撒手鐧添！廣男唔知中國眾多國企民企之中，未來會唔會有一間可以成為馬斯克嘅Space X，或者貝佐斯（亞馬遜公司創始人）「藍色起源」嘅競爭對手，唯一可以肯定講，中國科技絕對唔會就此停步，而係會繼續發展，香港科學家如果想投入相關研究，返內地絕對係一個好選擇。

原圖：中國國務院