作為I.T.人，開O.T.淥即食麵做宵夜梗係家常便飯啦，以往即食麵真係救返廣男條命唔少次架，試諗諗，條街啲舖頭全部閂晒門，夜媽媽又唔想咁麻煩開爐煮嘢食，咁仲又乜好得過即食麵先？呢啲經驗相信人人都有，唔使分享啦。不過講開即食麵，廣男尋日睇新聞，話國內即食麵銷量近年不斷下跌，有分析指有兩大主因：上網叫外賣愈來愈方便、高鐵愈來愈快，吓，又關事？

創新科技令衝擊即食麵？

梗係關事啦，如果大家對國內手機外賣業務唔熟悉，或者真係聯想唔到箇中關係，但如果你稍稍有了解，相信聽到上午分析唔會太驚訝。記得廣男之前喺文章都提過一名「香港仔」婁曉博，佢而家係內地「獨角獸」網上平台「美團點評」副總裁；佢早前嚟香港分享成功經驗，廣男從佢口中得知內地外賣點餐生意有幾勁！

原來，單係「美團點評」一個平台，喺2017年6月，每日已經做到1,200萬單交易，服務覆蓋廿幾個城市！1,200萬呢個數已經得人驚，更驚人原來喺2013年年底，「美團點評」每日「只係做到」十幾萬單交易「咋」，呢幾年升幅可以用「驚人」去形容。

每日有1,200萬單外賣交易

每日1,200萬單交易係咩概念呢？據婁曉博所講，單係「食」呢一項服務，內地市場每年就可創造3至5萬億人民幣收入；另外，舊年年底亦有報道，「美團點評」去年十月個估值已經突破2,300億元，係全球估值第4高初創企業，驚未？

講到底，上網已經成為內地人生活習慣，當大家想食嘢，就算係三更半夜都好，一樣可以上網或者用手機APP叫「新鮮熱食」做外賣，咁方便，即食麵銷量又點可以唔跌？

傳統行業受衝擊 不能再故步自封

至於第二個令內地即食麵銷售跌嘅理由，高鐵愈來愈快，其實一樣唔難理解。據講，以往有兩成即食麵喺係交通網絡消耗，尤其係慢慢行嘅火車上，咁近年高鐵普及，交通時間大大縮短，需要食麵嘅機會自然少啦。

廣男講咁多，都只係想帶出一樣嘢，就係科技進步，好自然會令到唔少傳統行業（包括即食麵）受到衝擊；內地發展應用科技已經愈來愈成熟，亦藉住呢啲創新科技掘到唔少金，香港人如果有機會參與，真係冇理由再故步自封，將自己困喺一個700萬人嘅「小城市」囉。喺香港做到再好，都冇可能做到一日1,200萬單交易啩，呢個數字仲要只係內地「其中一間」公司咋，走入內地發展機會有幾多，唔難明吖。

原圖：新華網