「香港眾志」黃之鋒、周庭等人噚日聯同一班盲反派人士衝擊立法會補選嘅候選人簡介會，場面極度混亂，期間仲有人用粗口辱罵選管會主席馮驊；其實同一班人前幾日已經衝擊過東區區議會一次，呢班人本質就係暴力，大家早已一清二楚。奇怪嘅係，一班經常用衝擊、暴力手段嘅年輕政客（尤其係「雙學三人」），竟然有12個美國國會議員要提名佢哋角逐2018年諾貝爾和平獎。唔理呢班議員背後有咩打算都好，但想將和平獎頒畀一班素來「唔和平」嘅政客，本身已經係一大諷刺！更玷污了諾貝爾獎呢！

和平獎頒給不和平的人？

囍雨唔係好熟諾貝爾和平獎嘅評審或者頒獎準則，但叫得做諾貝爾和平獎，至少肯定要對世界和平有貢獻。美國一班國會議員提名「雙學三人」黃之鋒、羅冠聰、周永康同整個違法佔領行動攞諾貝爾和平獎，即係叫有關獎項嘅委員會頒和平獎畀一班搞破壞嘅人？咁麻煩呢班國會議員同全世界講清楚，呢三位年輕人對全世界嘅貢獻係乜？佢哋呢班人做過乜，令到呢個世界更美好？

其他人點睇「雙學三人」，囍雨唔清楚，但根據囍雨呢幾年嘅觀察，「雙學三人」先喺2014年9月煽動學生衝擊政總，搞到有保安受傷、青年被捕，場面更被法庭定性為暴力；衝擊政總行動仲引發「違法佔領」，「雙學三人」又指揮其他人堵路、衝擊，期間又有人襲擊警察，甚至發生幾百暴徒包圍三警搶疑犯嘅暴行！仲話自己「和理非」，其實係行為暴力仲要用武器果隻！

講番近啲，就係「香港眾志」周庭被DQ之後，黃之鋒等人衝擊完東區區議會又到候選人簡介會搞事。真係想問下，佢哋邊一度「和平」，係咪只要聲稱爭取民主，就可以為所欲為，仲要畀佢哋攞埋獎先？

美國政客在香港策反有前科

有份聯署、提名「雙學三人」佢哋攞諾貝爾和平獎嘅美國國會議員，有唔少都一直喺香港甚至台灣搞風搞雨，好似共和黨嘅魯比奧（Marco Rubio）咁，就曾經無理攻訐北京干預特首選舉，又聲稱要保護喺香港爭取民主嘅人。唔止咁，原來呢個魯比奧擺到明視中國為敵人，仲刻意同台灣領導人蔡英文走得好埋，支持「台獨」味道甚濃、極濃！而另一位有參與聯署嘅史密夫（Christopher Smith），就曾經話林鄭月娥領導下嘅香港淪為中國大陸另一個城市（但事實上，香港的確係中國其中一個城市），大有挑撥離間、詆毀「一國兩制」意味！

講到呢度，相信唔駛囍雨講，大家都Feel到件事有古怪啦！做乜啲美國國會議員咁用力幫違法、搞事嘅「雙學三人」？當中最大可能，就係呢班香港年輕政客，其實只係美國佬用嚟打擊中國，甚至喺香港搞策反嘅「棋子」啫！

原圖：takungpao