周庭因為佢所屬政團「香港眾志」鼓吹「民主自決」而被DQ，唔可以參與立法會補選，「香港眾志」黃之鋒等人繼續貫徹其「暴民政治」作風，連同一班盲反派人士甚至區議員狙擊決定DQ周庭嘅選舉主任、東區民政事務專員鄧如欣；佢哋除咗衝擊區議會場地令到場面混亂之外，混亂中亦有人倒地不適，會議最終因為人數不足而流會。囍雨認為，今次DQ事件，正好就係一面「照妖鏡」，照清楚「香港眾志」一有事就會訴諸暴力嘅真本性。

選舉主任執法無罪

喺呢度，囍雨首先要為選舉主任說一句公道說話，無論周庭抑或「香港眾志」其他人，佢哋鼓吹「民主自決」或者「港獨選項」都明顯違反咗《基本法》或者《立法會條例》嘅要求，選舉主任根本就有責任決定參選人有冇遵從《基本法》規定或者有冇違反相關原則，周庭或者「香港眾志」唔符合參選要求，畀人DQ絕非無理，試問選舉主任依法執法，又何罪之有呢？

訴諸暴力乃「香港眾志」常用手段

所以「香港眾志」要針對或者狙擊選舉主任，根本就無道理可言。講番今次「香港眾志」帶隊衝擊東區區議會事件，囍雨對「香港眾志」有一個好大嘅質疑，就係佢哋係咪一有任何不滿，就要訴諸衝擊甚至暴力嘅手段呢？當年違法佔領行動之前，就係「香港眾志」黃之鋒同埋羅冠聰（當時佢哋係「學民思潮」或者「學聯」成員）煽動一班學生衝擊政總，直接引發違法佔領行動；而家佢哋因為自己唔合資格參選而被DQ，又喺度訴諸於暴力手段？唔通「香港眾志」成員，就剩係識衝、識搞事？

不棄港獨思維 難晉港政壇

可以想像得到，如果畀「香港眾志」成員選到入立法會，佢哋最常做嘅未必係議事工作，而係貫徹佢哋喺街頭嘅作風，只要一言不合，佢哋就會衝擊、破壞議會。用已經被DQ嘅前議員羅冠聰為例，佢除咗宣誓嘅時候因為修改、加減誓詞而被裁定議員資格無效之外，佢喺立法會議事廳亦不時做出搗亂行為。所以呢，如果再選「香港眾志」嘅人入立法會，結果係點大家都知啦！

其實，「香港眾志」成員作為香港市民，佢哋當然都有權利參選啦。不過，囍雨就認為佢哋日後如果仲想參選，應該先表明放棄「民主自決」或者「港獨」立場，話畀香港人聽佢哋真心擁護《基本法》，咁喺唔違反《基本法》原則嘅底線下，佢哋就應該可以參選喇！ 

原圖：Takungpao