立法會補選報名期結束，坊間都喺度談論有關「香港眾志」周庭被DQ嘅新聞，而喺另一邊，之前盛傳好有可能被DQ嘅姚松炎，就喺報名期結束前被選舉主任確認為提名有效。本來根據傳媒嘅報道，周庭、姚松炎二人都會雙雙被DQ，而家一個被DQ，另一個就成功入閘，當中有冇咩啟示？囍雨個人認為，咁就足以證明選舉主任並冇「政治任務」，否則肯定周、姚一齊DQ！

周庭踰越《基本法》的底線

根據傳媒報道，「香港眾志」周庭之所以被DQ，係因為佢所屬嘅「香港眾志」嘅綱領就係要「民主自決」，而「香港眾志」亦的確有成員講過「港獨」係其中一個選項。只要睇番《立法會條例》或者相關《規例》，都會知道參加立法會選舉，參選人一定要擁護《基本法》同效忠香港特區，呢個係基本條件，唔符合資格咪就冇得參選囉。所以囍雨認為，選舉主任DQ周庭，其實係職責所在。

至於姚松炎，坊間一直盛傳佢因為之前已經宣誓無效一次，今屆冇可能再參選到，或者因為佢本身都被定義為「自決派」人士，所以會被DQ。咁點解姚松炎又可以參選呢？囍雨冇第一手消息，但綜觀一直以嚟傳媒嘅報道，其實姚松炎冇咩講過要「自決」或者「港獨」等，所以選舉主任同姚松炎釐清咗幾個問題之後，最後都畀佢「入閘」。

姚入閘的啟示

周庭被DQ、姚松炎入閘有咩啟示呢？囍雨就認為，如果選舉主任真係有「政治任務」，最好方法就係將周庭、姚松炎甚至范國威（曾經有宣傳品講過「有民主，便不會有港獨」）都DQ，為建制派掃除最強嘅盲反派選舉代表。選舉主任最終冇咁做，最有力嘅解釋就係選舉主任真係單純根據法例原則做事，周庭嘅「香港眾志」擺明要搞「自決」，而自決其中一選項係「港獨」，咁梗係要DQ佢啦！至於姚松炎，雖然佢「自決」味道都好重，但基於佢唔係實牙實齒話要自決或者「港獨」，咁選舉主任最後亦都畀佢「入閘」。

其實，選舉主任無論係DQ一個或者兩個參選人，客觀效果都會令政府受攻訐、建制派選情更嚴峻，選舉主任堅持咁做，原因就係《基本法》、「一國兩制」嘅底線根本不容退讓。講真，囍雨到而家都唔明，既然有人要挑戰《基本法》、要玩「自決」同搞「港獨」，咁點解仲要走入建制去參加《基本法》授權設立嘅立法會參選？唔通真係為咗每個月十皮嘢津貼？斷估咋，唔肯定架！

原圖：RTHK