作為I.T.人、同時又對創新科技發展極之關心嘅廣男，近排都好留意粵廣澳大灣區嘅相關新聞。無他嘅，大灣區將來必定成為整個中國、以至全世界嘅科研中心之一，想喺呢一行發展，多啲關心真係正常不過。今日之嘛，廣男就睇到段新聞，裡面話原來舊年十二月，廣東省政府科技部已經透過銀行，將200萬人民幣資金轉帳到香港負責國家科研項目嘅單位；未來大灣區成立，地方政府之間合力拆牆鬆綁，資金流動就會更EASY，對科研嚟講，點睇都係好事！

沒資金做不了創科

大家都知道，要搞科研，人才、資金、土地、政策、法例，真係缺一不可。香港人才大把，各間大學每年為香港同內地培訓大量世界級專家學者，科研人員數量真係唔需要擔心。之但係講到資金、土地、政策，老實講，雖然上屆政府成功設立創新及科技局，但因為係「追落後」的緣故，所以暫時好多方面仍然未追得上內地，尤其係深圳呢個創科大本營。

今次廣東省將一筆資金交到香港負責國家級科研項目嘅單位，可以話係意義重大！對於科研嚟講，多一條「水喉」點都畀少一條「水喉」好，廣東省呢個舉措亦證明，大灣區倡議絕對唔係得個「講」字，而係切切實實咁計劃同執行緊。未來只要各地政策進一步完善資金流向嘅相關規定，各城市要做到優勢互補、將創科產業同科研項目「做大做強」並唔係冇可能！

廣東省科研實力強大

大灣區倡議，對香港、對科研都係百利而無一害，香港人才有幾叻，廣男唔講咁多喇，反正大家都知，亦係世界公認；相反廣東省近年科研成績原來都相當唔錯喎，因為單係去年，廣東省一共認定登記技術合同17,423項，成交總額高達949.47億元人民幣，其中技術交易額更達到928.62億！

咁大筆錢，但冇科研人才都冇用吖！冇錯，但大家又知唔知，原來廣東省正制定相關政策，逐步將省內實驗室、重點實驗室、大科學裝置等設施開放，不斷吸收港澳青年創新、創業者去到廣東做研究，尤其是香港優秀研究所、博士、博士後等等。嘩，真係聽到都興奮，似乎廣男都有機會重投科研懷抱喎。

多項政策惠及北上港人

點都好，雖然粵港澳大灣區規劃可能去到年中先會公布，但對創科業界嚟講都肯定係打咗枝強心針！聽講未來國家仲會為喺廣東落戶嘅研究稅費減免，相關單位甚至會考慮「補貼」或「協議」等方式去解決稅費差額，好處多到瀉，作為創科人、I.T.人，大家冇理由唔期待。

原圖：網絡圖片（取自大公報）