一班浸大生因為唔滿意學校嘅普通話豁免試，竟然成班人走去「佔領」語文中心足足八個鐘，仲要係用粗口加疑似威嚇手段「佔領」果隻；當兩個主要涉事學生被停課之際，囍雨聽到有唔少評論，包括香港主流傳媒網媒，都質疑校方「講下粗口啫，駛唔駛搞到咁嚴重呀」等等。囍雨就覺得，有人似乎仲未搞清事情嘅本質，事件唔止係「講粗口」咁簡單，而係有人包圍、佔領甚至威嚇教師，而且足足八個鐘，係八個鐘呀！

問題豈止於粗口

當有人不斷話「講粗口好少事啫，駛乜搞到停人課」嘅時候，囍雨必須強調，件事唔係咁簡單囉！就算撇除學生講粗口嘅問題，大家必須明白，呢班學生衝去語文中心玩「佔領」，唔係大家睇到網上片段果幾分鐘咁簡單，而係「佔領」咗語文中心八個鐘，期間仲係要啲語氣好似「兇緊」啲教師咁，當教師叫佢哋退後啲、覺得受威脅嘅時候，囍雨睇片仲見到有學生「好型」咁問「我做乜要退後啲，你唔退？」，據報有教師事後委屈到向人哭訴，呢啲係小事？呢啲係同教師和平討論？唔好玩啦！

當啲盲撐「佔領」嘅人覺得件事要「輕輕放下」嘅時候，大家真係要諗一諗，如果今次「輕輕放下」甚至完全唔處理呢啲學生，咁下次啲學生或者其他大學啲學生有「訴求」，照辦煮碗走去圍啲老師、教職員，真係冇問題咩？呢個真係而家盲撐學生啲人所認為嘅表達意見「正常渠道」咩？諗到呢度，囍雨都覺得班盲撐「佔領」學生嘅人好有問題，如果佢哋畀人「圍」八個鐘仲可能係恐嚇果隻都依然覺得冇問題，咁囍雨都無話可說。

事件是否涉及刑事？

仲有一點，囍雨覺得大眾都因為「粗口」問題而未必留意到，就係呢班學生咁樣「圍」老師或者疑似嚇啲老師，到底有冇涉及一啲刑事罪行？例如「非法集結」、「刑事恐嚇」同「非法禁錮」等等，呢個都係未知之數（尤其八個鐘內實際發生過咩事外界都唔係好知），如果有人硬要盲撐班「佔領」學生，囍雨干涉唔到，因為呢個係你哋嘅思想自由，但囍雨只想問一句，如果係你哋畀人「圍」、畀人鬧，會唔會仲係咁「寬宏大量」先？做人嘅嘢，有時都係將心比己，攞啲同理心出嚟好啲。

原圖：港人講地