呢排睇到單幾得意嘅新聞，就係中國科學家成功複製出兩隻馬騮出嚟，研究成果仲上埋國際權威學術期刊封面，即係件事「珍珠都冇咁真」！對於一向少留意科研新聞嘅香港人嚟講，或許唔知點解今次複製馬騮會咁引人注目。查實係因為今次係第一次成功複製出「靈長類」動物，而相比起其他物種，呢項研究就明顯複雜得多，亦係對中國科學研究嘅一種肯定。不過與此同時，有唔少人都開始諗，今次成功複製馬騮，遲下會唔會複製人類呢？大家唔使擔心，因為負責複製馬騮嘅學者已經講明：NO WAY！

動物複製技術一大突破

雖然廣男係科技迷，但老老實實，都係睇新聞先知，原來複製靈長類動物比起複製物種係「難得多」，而外國科學家就一直對複製靈長類動物都束手無策喇，反觀近年科研實力超級大躍進嘅中國就率先搞掂。不過一如所料，每次有複製動物「誕生」，社會都有好多討論，到底人類應唔應該複製動物，呢個一直係學術、道德、倫理同宗教等等界別爭論不休嘅話題；複製動物都咁大爭議，如果複製人類呢？

點都好，大家唔使估估吓，至少負責今次研究嘅中科院院士、神經科學研究所所長蒲慕明就講明，複製馬騮目的係為咗人類健康，因為可以藉呢種技術複製遺傳基因一樣嘅馬騮出嚟「試驗新藥」，希望最終可以搵到醫到人類奇難雜症嘅「藥」，例如腦退化症、自閉症等等，亦因為咁，中國科學家亦不忘初衷，唔會走去複製人類！

複製人類的道德難題

雖然中國科學家講明唔會複製人類，但始終「基因」相關研究仍然好容易引起道德爭議，就算只係用複製馬騮「試藥」，呢樣已經引來好多人不滿。仲有仲有，之前有外國科學家研究修改胎兒基因，令到嬰兒唔會遺傳到父母嘅疾病，同埋得到更加好嘅基因；但同理，咁樣又係咪對一啲出身背景無咁好、無能力承擔嘅家庭嘅人嚟講，極之唔公平，係真真正正「輸在起跑線」呢？

科研進行，當然可以解決好多人類生活需要，不過都係嗰句，科研除咗改善人類生活，更重要係等人類「認識」呢個世界，但唔係「主宰」呢個世界！中國科學家經幾十年努力，終於走到今日呢一步，成為科研大國之一，廣男始終認為最難得係，大家仍然不忘初心，明白科研係「改善」人類生活，唔係「創造」人類；呢個係同中國人傳統道德文化有關，中國學者知道君子「自強不息」之餘，亦明白「順應天命」極為重要，中國人係得嘅！ 

原圖：新華網