最近有一單國際新聞非常有趣，正受「通俄門」困擾嘅美國總統特朗普，原定會同佢夫人梅拉尼婭一齊出席喺瑞士達沃斯舉辦嘅世界經濟論壇，點知有傳媒爆料，話特朗普曾經同AV女星有染，仲喺自己大選前畀左大筆「掩口費」，搞到梅拉尼婭嬲到唔同佢去瑞士。特朗普究竟係咪曾經同成人片女星有染、有冇畀「掩口費」人哋，廣男梗係唔知啦；不過，佢今次去世界經濟論壇，除咗私生活外更加要面對唔少麻煩，除咗喺瑞士有一大班示威者等住招呼佢之外，有啲外國領導都直接、間接畀說話佢聽，唔知佢呢個「瘋狂」嘅美國總統，會點樣見招拆招呢？

被批退出《巴黎協定》

先講做生意呢一個範疇先，特朗普最近簽署法令，大幅提高被指針對中國和韓國嘅太陽能電池板同洗衣機入口關稅，正喺呢個時候，首次出席世界經濟論壇嘅印度總理莫迪批評有國家奉行保護主義，破壞國際貿易協定，「疑似」針對美國總統特朗普；另一方面，德國總理默克爾亦接力發，批評有國家太過「自我中心」，仲「點名批評」美國宣布退出《巴黎協定》。《巴黎協定》係乜東東？其實《巴黎協定》就係由全球多個國家喺2015年通過，2016年底正式生效嘅全球氣候協議。

有分析指出由於發達國家須支援發展中國家達致環保目標，又要承擔更大嘅減排責任，對經濟或者有影響，所以有已發展國家有協議有保留，而特朗普就認為《協定》係騙局，令美國製造業受限，所以宣布退出《協定》。

環保乃全球責任

做生意又搞保護主義、環保又唔係盡超級大國責任，雖然廣男唔係咩環保友，更加唔係美國FANS，但亦感到唔多妥！全球氣候暖化，天氣越嚟越極端，相信就算唔係專家都會感受到呢個大轉變，特朗普以本土經濟為藉口，退出《協定》唔能令人接受之餘，廣男都好懷疑究竟《協定》係咪真係對美國有咁大影響。

首先，美國其實可以利用排碳稅或向其他國家購買排碳配額（廣男理解為自己國家排碳量達上限，向其他排碳量未滿嘅國家買Quota）應對問題，而排碳稅收益又可以用番嚟推展經濟，特朗普將問題講到咁嚴重，為美國經濟定係為政治利益，大家真係可以諗一諗！其實，保護環境係全球每一個國家嘅責任，就算減碳會造成不便，都係絕對有利於全球嘅氣候環境。

話時話，唔講大家唔知，中國今日已經係世界第二大經濟體，亦係碳排放大國之一。雖然係咁，中國絕對冇放棄過環保責任，堅持唔會退出《協定》之餘，總理李克強舊年仲強調，中方會承擔《巴黎協定》中應對氣候轉變的責任，而為咗履行《巴黎協定》的承諾，中國近年來大力調整產業同經濟結構，對高耗能高排放嘅鋼鐵、水泥、化工同冶金等行業進行咗大量調整，淘汰落後產能，成績得到國際認可。邊一個國家有盡到做「大國」嘅責任，大家心照啦。

原圖：中新社