新界東北發展計劃風波不絕，發展局局長陳茂波噚晚就到粉嶺同村民見面。本來會面係解決問題既好開始，但有村民要陳茂波星期五去政府總部同市民公開辯論，遷拆寮屋又唔可以剩係以公屋安置，開開下仲有部分人走埋，呢種抗爭式既對話，根本放諸任何情境都難以解決問題。

就咁睇，寮屋居民又要出席居民大會，又要求陳茂波星期五到政總辯論有啲矛盾，成個局長企咗喺佢哋面前，有訴求可以直接表達，何須多此一舉要陳茂波去多轉政總呢？

事實上，啲居民既聰明，又陰濕，如果陳茂波真係星期五去政總同啲示威者傾，所謂既辯論只會變成叫囂，迫陳茂波撤回新界東北方案，喺群眾壓力下就算陳茂波頂得住，電視畫面、媒體報導都會營造到陳茂波唔聽民意既「主觀」效果，但客觀事實係大部分香港市民都贊成要發展新界東北。

至於寮屋換公屋，仲要入息審查既做法，有寮屋居民表示不滿。係就係不滿，不過不滿既係一眾想上樓、買居屋到望穿秋水既市民先真。寮屋係咩？塊地點嚟？答案係霸番嚟，當年政府知道房屋供應不足，所以容許寮屋暫准存在，而家要寮屋戶交番塊地出嚟，真係咁唔公道？土地正義，就係暫准存在既寮屋戶可以繼續田野生活，但等緊公屋既劏房戶就繼續捱？廣男無意將兩類人對立起嚟，但正義唔係應該令有需要既人得到幫助咩？

一直要求政府、發展局多同居民溝通既係居民自己，而家如願以償，陳茂波親自落區再同居民會面，居民又要離場抗議；呢個又要溝通，但又拒絕溝通既做法，未免有啲自打嘴巴。就算陳茂波甚至特首梁振英親自到政總或者立法會外同新界東北居民會面，莫講話辯論，到時就算唔變成暴力衝擊事件，都一定變成只有謾罵、沒有對話既場面。

利申：家住資助房屋既廣男，居住地區亦都係當年政府開發既新市鎮之一，如果政府從前、現在、未來都唔開發新市鎮，可能啲基層市民連劏房都租唔起！

原圖：網絡