近日網上其中一單最熱嘅新聞，非浸大一班自以為是嘅學生，因普通話豁免試唔合格，上演咗一幕「佔領校園」莫屬。件事是非黑白，相信唔使點分析都知學生錯晒，呢班所謂「學生」連對人基本尊重同禮貌都冇，話係「學生」都侮辱咗「學生」兩個字！不過咁，今日香港「學生」真係「癲處未算癲」，有份爆粗鬧老師嘅學生會會長劉子頎公開質疑學生需唔需要有普通話能力先畢到業，聽到廣男耳都側埋。老老實實，香港年輕人唔當中國係自己國家，廣男都冇計，但學好普通話通街都知係全球趨勢，大學想學生畢業有一定競爭力，到底有咩錯先？

學好普通話為大勢所趨

大家諗下，美國總統特朗普幾個月前「國事訪問」中國，專登用平板電腦向國家主席習近平伉儷Show出自己孫女嘅短片，短片中特朗普孫女用中式打扮、以普通話向習近平伉儷問好，仲用普通話唱埋歌添。如果普通話真係咁唔重要，特朗普啲外孫又駛乜特登搵專人教普通話呢？稍為有腦嘅人都會諗得明當中道理，不過廣男明白，要求今日班大學學生代表「有腦」、就算只係少少，可能都有困難，冇計。

如果大家覺得單一例子無乜代表性，Okay！根據外國媒體報道，喺短短呢幾年間，學普通話嘅外國人數增至3,000萬人，甚至有評論提出疑問，普通話會唔會改變英文嘅國際語言地位。如果話普通話會成為世界最主要語言，當然未必得啦，但廣男之前睇新聞，見到包括Amazon創辦人貝佐斯啲仔女、Facebook創辦人朱克伯格以及英國威廉王子嘅大仔都學普通話，呢班世界名人之所以要求班仔女都去學普通話，好明顯就係佢哋認為「有需要」！

以上述一班名人嘅高度同野視都認為學普通話係「有需要」，劉子頎會長真心唔知憑乜理據去質疑。呢班所謂大學生，打從心底質疑普通話嘅作用，似乎佢哋只係睇到眼前好短暫嘅需要，而忽視咗學好普通話對佢哋「將來」事業發展嘅作用。

學生可以廢除課程？

查實根據劉子頎嘅講法，廣男理解到佢想講嘅，意思應該係如果普通話係不必要，咁學校就取消呢個課程或者豁免試佢啦！對於學生想用行動廢除課程嘅想法，廣男可能比較Outdate，比較少聽到呢種講法。學生選擇入讀某間學校，唔係同意課程先讀架？讀讀下唔對路就話不如唔駛讀，咁讀文科嘅中學生如果覺得數學冇用，係咪又可以要求DSE唔考呢科呢？如果連課程都要由班學生「說了算」咁佢哋似乎太惡喇喎！

你唔學普通話你嘅事，冇人會管你，但呢班疑似大學生必須同社會交代一個問題：點解當初選擇入選浸會大學？明知呢間大學要求畢業生有一定普通話水平，你咁唔喜歡你可以唔讀，冇人迫你喎。呢班所謂學生，每年拎我哋班納稅人咁多公帑去讀書，到底讀咗啲乜返嚟？浸會大學管理層，你哋有責任盡快畀個交代香港市民。唔該！

原圖：港人講地