噚日大台做「萬千星輝頒獎典禮」，廣男見到王浩信攞「視帝」（最佳男主角），睇到相當之感動；正當廣男睇完大台一年一度嘅矚目節目，個人都未calm down，竟然喺新聞見到唔少內地地區經濟數據已經超越香港喇，你話係唔係「來回地獄又折返人間」吖。內地城市經濟實力強，已經唔係近一、兩年嘅事，除咗位居榜首嘅上海外、深圳2017年嘅GDP亦已經超越香港；不過咁都唔係最驚，最驚嘅地方係原來廣州都可能已經追平香港喇！咁講法，香港喺珠三角嘅龍頭位置，唔單止跌咗落「阿二」，分分鐘仲有變「老三」，唔係啩？

廣州追上香港？

2018年都已經開始咗超過廿日，全國各大地區陸續公布2017年經濟數據。排首位嘅上海2017年嘅GDP突破3萬億元人民幣，喺高速增長嘅情況下GDP年計升幅都Keep到6.9%，都咪話唔犀利；而北京同深圳分別排第二同第三。值得大家留意嘅係，第四位嘅廣州喺2017年嘅GDP都已經突破2萬億元人民幣大關，有2.15萬億元人民幣。2.15萬億元人民幣，大約等於2.58萬億元港幣，按照香港政府預計本港2017年增長為3.7%計算，香港舊年嘅GDP推算大約有2.58萬億元港幣。即係話，廣州上年嘅GDP，可能已經追平甚至超越香港。

其實，廣州嘅GDP唔單止有望追平或者超越香港，佢嘅GDP總值亦有可能已經超越新加坡呢個「四小龍」國家。如果話深圳GDP超過香港，可能大家都會因為深圳近年經濟發展迅速而覺得有可能；但廣州作為一個大家平時未必好留意嘅地區，原來不知不覺間都進步得咁快，真係有少少估佢唔到。

轉型至服務業為主導

翻查資料，原來廣州係一個第三產業（服務業）已經非常發達，佔GDP總額嘅六成幾至七成，而且係國家最重要嘅汽車製造中心之一，豐田、本田等國際企業都有啲廣州投資；而高端電子信息產業喺廣州亦「純熟迅速」發展，松下、索尼都有喺廣州設立部門。作為廣東省省會，又係國家級嘅交通要點，相信廣州喺將來仲大有發展空間。

以前啲人成日話「行路上廣州」，將以前嘅交通甚至內地地區都講到好落後咁，但而家內地唔同地區唔單止發展迅速，我哋就快仲可以搭高鐵上廣州。等高鐵開通之後，等廣男都學下「小明」，搭高鐵去下廣州，睇下有幾「樂悠悠」先得！

原圖：文匯報