福布斯公布香港50大富豪榜，長和系主席李嘉誠繼續蟬聯香港首富。不過呢個唔重要，反而唔知大家有冇留意到，喺科網股持續向好情況下，阿里巴巴執行副主席蔡崇信以104億美元，排名升咗上Top Ten，由舊年第12位升至第9位，晉身本港十大富豪。等等，蔡崇信邊位呀？有咩咁犀利升到第9位先？佢犀利嘅地方除咗係佢有本事之外，當年仲有放棄幾百萬年薪，到內地扶助馬雲創業，佢獨具慧眼甚至可以話係預視未來嘅眼光，真係冇得輸！

500萬年薪變500元月薪？

廣男曾經睇過一本關於馬雲創業嘅書，入面講到馬雲經歷幾次創業失敗依然唔放棄，繼續喺事業上打拼。就喺馬雲再次創業、成立阿里巴巴之後，本身係法學博士兼經濟學士、身薪過500萬港元嘅香港人蔡崇信，第一次同馬雲見面嘅時候就畀佢人格魅力吸引住，於是同馬雲講自己識法律同財務，可以加入阿里巴巴幫佢。

當時嘅阿里巴巴，只係一支廿幾人嘅團隊，馬雲對於蔡崇信想加入都「嚇咗一跳」，話畀唔起咁高人工，一個月最多只可以畀500蚊（相信係人民幣）人工佢，但蔡崇信依然堅持加入。故事發展到而家，就成就咗一個香港居民北上打工，變成百億富豪嘅故事喇！

北上故事多籮籮

除咗蔡崇信，香港人或者華人到內地發展而又成功嘅故事實在多不勝數，今日廣男嘅同事就講咗另一個故事，有一個70後嘅「香港仔」婁曉博，故事一樣咁勵志。

婁曉博喺香港讀小學同中學，去咗美國讀大學讀書之後喺矽谷Ebay做嘢，做到高薪厚職，其後更嘗試幫呢間美國公司打入內地市場，點知因為各種原因，慘敗而回；就係呢一役，令呢位「香港仔」體會到究竟中國內地個內需市場有幾頗大，高瞻遠矚嘅佢，點會唔被畀內地個互聯網市場吸引吖，於是毅然減薪四成，去到上海加入大眾點評網。2015年大眾點評網同美團網合併，成為內地「三大獨角獸」之一。其實，婁曉博開頭到上海都非常唔習慣，病足半年，好彩佢同太太都有堅持落去，而家都已經創出一片天，成為美團點評副總裁。

可能講出嚟有啲「傻豬」，但廣男有時都喺度諗，如果有一日廣男有咁好機會，都想出外闖一闖，睇下自己可以「飛得多高，去得多遠」。人，有時係要發夢嘅 … 哈哈！ 

原圖：hsmrt