喺呢個電子支付愈來愈普及嘅年代，有人話過幾乎任何交易都可以用電子方式畀錢。今日廣男睇新聞，話北歐國家挪威電子支付程式非常普及，連街頭藝人同埋行乞嘅都要用，仲話有行乞者話，由於挪威邁向「無現金化」，如果無相關電子支付程式嘅話，連「搵食」都有困難。見到呢一則新聞，就令廣男諗起有同事同廣男講，喺內地無微信支付買唔到三文治嘅「悲壯故事」；其實而家電子支付模式咁流行，唔知香港幾時都可以邁向「無現金化」呢？

電子支付在內地盛行

電子支付模式喺內地盛行，已經人所共知，坐喺廣男隔離嘅「靚仔」同事早幾日先同廣男分享，話自己喺內地食早餐，但由於身上只有現金，無微信支付，結果搞到喺北京街頭買唔到早餐！話說當日，身處北京嘅同事喺街邊想買份三文治頂肚，正當佢攞啲人民幣出嚟嘅時候，個檔主反問：「不收現金，沒支付寶、微信支付？你是香港人嗎？」搞到廣男同事「有錢都冇得食」，真慘情。

廣男呢位同事「總結經驗」，話香港人要開內地嘅電子支付戶口雖然較麻煩，但為咗日後番內地嘅時候唔會「冇啖好食」，一定要想辦法開個電子支付帳戶。希望遲啲有關公司同相關政府部門可以喺呢方面提供多啲措施便利香港人，咁港人返內地旅遊、公幹，甚至到內地發展都方便啲啦！

香港支付系統曾領先全球？

不過咁，相對於內地或者其他國家嘅電子支付系統，有人認為香港相對嚟講「好落後」，廣男認為呢個說法只係「答對了一半」。首先，香港並唔係冇電子支付系統，除咗八達通，大家用果啲乜Pay、物Pay，其實都係電子支付系統嘅一種，只係普及程度未必好似內地果啲咁普及啫；再者，大家可能唔知道，「偉大」嘅八達通喺1997年面世嘅時候，曾經係領先全球，外國大城市都爭相仿效嘅儲值支付卡。

所以，香港喺呢方面實在唔需要妄自菲薄，只要努力啲發展好電子支付系統，話唔定有一日大家都唔駛再帶現金出街嘅。

原圖：beetify