雖然而家會留喺屋企睇電視嘅後生仔越來越少，但廣男係少數由細到大、到而家都好鍾意睇香港電視劇嘅80後；雖然近年本地電視劇「屢受批評」，但廣男以「有同情嘅理解」看待本地電視劇，反而覺得本地劇集近年開始進步番，由《踩過界》、《不懂撒嬌的女人》到而家《溏心風暴3》，廣男統統都有追。唔知係咪因為呢啲劇同內地合拍，資金同時間都多咗，所以質素都有所「提升」呢？

不少大製作為「合拍劇」

觸發廣男寫呢篇文章嘅原因，係因為廣男睇新聞，話喺《溏心風暴3》入面飾演「偷食賤男」嘅唐文龍「鹹魚翻生」，而家喺內地爆紅，仲多咗好多工作機會；對於唐文龍，廣男一直都覺得佢真心正（利申：廣男並唔係同志），但想當年佢喺大台套《十月初五的月光》入面飾演「金勝」一個角色，廣男已經覺得佢形到爆，而家佢因為再喺香港電視劇演出而「爆紅」，廣男都戥佢高興。

講番《溏心風暴3》，據報喺內地點擊率接近15億，都咪話唔犀利。原來，佢同另外兩套廣男好鍾意睇嘅劇集《踩過界》、《不懂撒嬌的女人》一樣，都係同內地媒體合作嘅「合拍劇」。廣男上網睇資料，有報道話近年大台劇集唔少收視低迷，部分收視較好或者引起社會討論嘅劇集，有唔少都係「合拍劇」，而以上幾套就係最佳例子。

接近電影質素的劇作

據講，「合拍劇」因為時間充裕，拍攝時又可以用「類電影」模式，單機拍攝、實景拍攝、燈光、攝影都貼近電影製作模式，呢種情景同早年畀人炮轟「工廠流水線製作」嘅方式大有不同，所以「合拍劇」有咁高質素，真係事必有因。作為一個電視劇迷，廣男唔介意本地電視台同內地合作拍劇，亦唔介意畀內地觀眾睇先，只要套劇係好睇，邊個拍、同邊個合作，又有咩所謂呢？廣男唯一要求，就係拍多啲好似《踩過界》呢啲新題材嘅電視劇，等觀眾可以保持多啲新鮮感！

有報道話，香港觀眾將會欣賞到另一「合拍劇」鉅作《再創世紀》，廣男真係萬分期待，當年大台一百集《創世紀》，真係睇到廣男呢啲學生哥「熱血沸騰」；如果《再創世紀》同《創世紀》一樣講啲人買唔到樓，相信到時一定有唔少迴響！

再利申：其他劇例如《降魔的》、《使徒行者2》相信都好好睇，不過廣男礙於屋企有小朋友，唔方便喺闔家歡時段收看，So Sad囉。

原圖：網絡圖片