廣男讀大學時，喜歡到深圳書城掃平書，並發揮「吃貨」本色，享受廉價美食，一晃眼，近10年過去，今日嘅深圳已經係另一番景象，今日就有一篇報道，話以2017年嘅GDP計算，估計深圳已經「超越」香港，成為「粵港澳大灣區」龍頭！以前大家覺得香港畀內地城市追過只係靠嚇，但攞「深圳速度」同「香港速度」相比，就覺得並唔出奇。

深圳GDP超香港

深圳最近公布2017年經濟數據，預計GDP達2.2萬億人民幣，喺估計香港嘅GDP唔會超過2.18萬億人民幣嘅前提下，幾乎肯定「超越」香港同廣州，成為大灣區「經濟一哥」！另一方面，國務院噚日公布將深圳經濟特區同非特區以鐵絲網圍起嘅「二線」撤銷，即係深圳核心區域可以再發展擴大，擺明就係話深圳發展愈來愈勁，原有土地「唔夠使」囉。差唔多同一時間出現深圳GDP超越香港同撤銷「二線」嘅新聞，香港人真係要知驚。

近年深圳發展迅速，更有「設計之都」、「科技之城」嘅稱號，騰訊、華為以至大彊等國際企業都喺深圳紮根，令深圳喺創科方面具有國內領先地位；作為一個「香港仔」，近年不時北上做嘢，見到以前畀香港人認為「好落後」嘅深圳「終於超越」香港，廣男唔多唔少都有啲感慨。

香港太多爭拗嗎？

曾經幾何時，我哋都好Proud of自己係香港人，但大家睇下其他地方例如深圳嘅企業，華為雖然成立咗唔係好多年時間，華為已經係全球頭100名以內嘅企業、全球第三大手機製造廠；另一間科網巨擘騰訊，即係升到呯呯聲帶挈唔少股民賺錢嘅「神股」，上年亦都躋身入全球500強企業。如果用整個地區嘅數字計算，深圳自2010年起，年均GDP增長接近10%，但同期嘅香港年均GDP增長大約只有3%。睇到呢啲內地新興而且勢頭強勁嘅企業同深圳GDP數字，再睇香港仲係靠金融地產同增長放緩嘅GDP數字，真係 …… 唉！

香港不能再原地踏步

呢十年香港發展上嘅進步真係好少。香港近年最出名係乜呢？咪「政治爭拗」囉，發展方面就「蹉跎歲月」，上街遊行示威玩暴力唔在講，立法會「拉布」成風、講粗口、流會兼掟嘢，喺不進則退嘅定律下，香港今日先被其他城市超越，已經算好彩。

有政治訴求唔係錯，但唔代表民生可以原地踏步囉。深圳之所以成為大灣區龍頭，係因為佢哋先發展工業，到睇到工業發展有限制嘅時候，就銳意發展第三產業（包括創新、服務業），而且係勇往直前嗰隻。今日香港，大家都應該見到係極度需要發展新產業，上屆政府有遠見成立創科局、同埋為河套區港深創新及科技園「開個好頭」，至於有冇「尾彩」，一句到尾，其實都係掌握喺香港人自己手！

原圖：eastday