嚟緊三月就係立法會補選，盲反派日前搞初選，決定喺新界東派出新民主同盟范國威、九龍西派出姚松炎參選，連同喺香港島參選嘅「香港眾志」周庭，可以話三個參選人都係「本土」或者「自決」派。對於盲反派喺三個直選議席都派出所謂嘅本土或者自決派參選，囍雨認為大家必須問佢哋兩個問題，就係佢哋支唔支持「港獨」？同埋就算而家唔支持「港獨」，會唔會「過到關」、入咗立法會先轉軚支持「港獨」或者「暗獨」呢？

三人政治立場成疑

老實講，喺一眾疑似參選人未有正式嘅政綱公布之前，囍雨就覺得大家首先要搞清楚佢哋嘅基本立場先，大家都知啦，而家所謂「非建制派」政治光譜真係闊到無限大嘛。到底周庭、范國威同埋姚松炎，支唔支持「港獨」或者「暗獨」。囍雨提出以上質疑絕對唔係無的放矢，好似周庭咁，佢所屬嘅「香港眾志」講到明係以「民主自決」為最高綱領，所謂「民主自決」，係咪包括煽動市民搞「自決」，繼而想令香港獨立呢？

至於范國威，佢嘅「本土形象」鮮明幾乎係人盡皆知嘅事，雖然佢一直都冇話自己搞「港獨」，但囍雨曾經喺網上面，見過一個范國威嘅網上宣傳品，大大隻字寫住「有民主，便不會有港獨」，言下之意，佢係有可能支持「港獨」？立場都依然係好曖昧嘅。計囍雨話齋，佢哋三個應該先清楚交待自己喺「港獨」上面嘅立場，仲要講到明就算選到入議會，都唔會反口突然支持「港獨」；否則，大家就算想支持佢哋，都要諗清諗楚！

本土激進勢力冒起

可能政治氣候或者盲反派內部勢力有所改變，今次「初選」跑出嘅竟然全部都係本土或者自決派；囍雨無得過問盲反派支持者嘅「喜好」，但喺度要提醒各位精明嘅選民，萬一投錯票選咗支持「港獨」或者「暗獨」嘅政客入立法會，佢哋分分鐘喺議內外煽動抗爭、違法行動，到時議會變成「戰場」，香港市民又再難有安寧，大家真係要睇真啲！

原圖：RTHK