上回廣男講到美國總統特朗普同北韓領導人金正恩「你一言，我一語」，兩個都話自己有「核按鈕」，萬一擦槍走火就大件事。廣男今日又睇到有關特朗普嘅新聞，不過今次佢就唔係針對一向「重點攻擊」嘅金正恩，有報道指佢同唔同黨派參議員傾移民政策時，話海地、薩爾瓦多等非洲國家係「垃圾國家」，雖然特朗普透過Twitter發帖否認使用粗俗字眼，但就承認自己語言嚴厲。廣男好奇怪，雖然美國向來號稱為「世界超級強國」，但特朗普嘅作風，似乎強到目中無人咁，反而中國就積極向非洲推介「一帶一路」，就話非洲唔可以缺席呢個共同發展機會添，真係好大差別喎。

非洲國家係垃圾？

喺講特朗普嘅一番「嚴厲用語」之前，廣男首先想講下今次特朗普「被指」用嚟話啲非洲國家嘅一個字，據報以「shxxhole」呢個字嚟形容啲非洲國家，呢個字有啲媒體解為「垃圾」，但實則呢個字可能畀「垃圾」更來得差，可以指係「極其骯髒、破爛不堪或者令人嘔心嘅地方」；阿Trump Trump如果用呢啲咁嘅字，實在係離晒譜！

對於特朗普一番「言論」，除咗引嚟「非洲聯盟」（African Union）譴責，海地政府發聲明指言論帶侮辱之外，薩爾瓦多亦都向美國提交抗議信，表明反對特朗普相關言論。特朗普作為美國總統，佢講呢啲說話雖然唔妥當，但廣男認為佢嘅言行其實好符合佢一向作風。但點都好，類似嘅言行真係相當唔理智，睇低啲非洲國家嘅「白鴿眼」，更可能仲會斷送美國將來嘅發展。

中國視非洲國家為國際合作夥伴

呢邊廂特朗普疑似將非洲國家「踩到盡」，你當人係草，人哋當佢哋係寶，中國就向非洲國家伸出友誼之手；中國外長王毅日前就啟程前往盧旺達、安哥拉、加蓬、聖多美同埋普林西比四個非洲國家訪問，大力推銷「一帶一路」，仲話喺「一帶一路」嘅進程當中，非洲唔能夠缺席，表示要推進「中非」全面戰略合作夥伴關係到新階段。中、美兩個大國，對非洲國家嘅取態南轅北轍，到底邊個先至do the right thing？

老實講，雖然非洲國家雖然而家發展普遍落後，但潛力一啲都唔可以睇少。廣男有位中學師兄，而家喺埃塞俄比亞開製衣廠，專為當地學生造衫，更得到當地政府大力支持。據講，佢曾經同當地負責商貿嘅部長開會，有關嘅計劃仲係得到該國總統親自批准添！雖然，當地社會環境仲有好多值得改善之處，例如佢出街同去工廠途中，都要有軍隊保護。不過唔講唔知，呢位師兄話今日非洲好多城市，其實已經唔係哀鴻遍野嘅災區，部份政治環境較穩定嘅，城市管理同設計都比我哋想像中乾淨、整潔得多，雖然華人行喺街上或者喺當地做嘢都仲係少數，但好明顯今時不同往日，可謂機遇處處。

呢位大師兄，敢於向外闖，今日已經搵夠錢住獨立屋，呢個都係拜佢當日敢於「走出去」所致；呢位老友同廣男講，未來喺「一帶一路」國策下，可以預見得到非洲將來會有唔少發展機會，佢已經決定留喺當地政展拳腳。

老老實實，廣男相信香港人唔會好似特朗普咁「排外」，始終香港之所以有今日嘅成功，就係因為我哋上一代嘅前輩，把握到好多人其他人睇唔到嘅機會。敢闖、敢創嘅，就會搵到機會，唔駛喺香港捱貴租、貴樓！

原圖：外交部