立法會議員兼理工大學專任導師鄭松泰，舊年被判侮辱國旗和區旗罪成，理大隨即成立紀律委員會跟進，日前終於得出結果，決定等鄭松泰六月底約滿後，唔再同佢續約，但就冇其他合理處分。罰都唔罰，鄭松泰執返身彩啦，誰不知佢仲話事件係「政治迫害」，真係令人眼都凸埋。對於鄭松泰呢種說法，相信香港人都莫名其妙，一個犯咗刑事罪嘅教師，學校唔同佢續約有幾出奇？況且理大都只係表明幾個月之後唔同佢續約，諗真啲，其實連懲罰都算唔上囉！

鄭松泰違法罪成 豈容放過

先唔好講鄭松泰所謂嘅「永續基本法」係咪搞緊「港獨」、亦唔理佢支持同聲援「旺角暴動」嘅暴民，單計佢身為立法會議員，應該畀一般人更知道要守法同尊重法治，但今次佢竟然公然喺立法會議事廳倒插國旗同區旗，藉以侮辱國旗同區旗，如果一間每年接受巨額公帑資助嘅大學都唔正視轄下有職員做啲咁嘅行為，咁會唔會向學生傳遞錯誤訊息呢？犯法在先嘅鄭松泰，唔向學校道歉自己做壞榜樣不特止，仲調番轉話畀人「政治迫害」，大家話係唔係好過份呢！

不續約不是懲罰

另一個重點，係在於理大決定唔同鄭松泰續約，諗深一層其實都唔係咩懲罰，大學作為僱主，絕對有權唔同任何合約制員工續約，唔續約唔代表係懲罰，而只係鄭松泰做衰嘢嘅結果。真係算得上「懲罰」，至少要即時終止合約「解僱」，而家竟然畀埋幾個月「通知期」，鄭松泰真係「賺到笑」！

不過咁，除咗理大紀律調查之外，其實立法會都已成立咗調查委員會，包括討論鄭松泰有冇違反誓言，預計下個月有結論，鄭松泰如果真係被裁定有違誓言又有在席嘅三分之二議員投票譴責佢，可能連議席都會冇埋。到底鄭松泰命運如何，立法會議員們（包括非建制派）又可唔可以有公正判斷？大家真係要拭目以待喇！

原圖：news.tvb