近年的士服務常常受人詬病，市民不時會喺媒體、互聯網度耳聞目睹種種有關的士嘅投訴，更不斷有聲音要求政府介入改善質素；去到噚日，政府終於公布成立「的士服務質素委員會」，除咗官員、議員之外，仲搵埋業界代表加入，以正式渠道研究改善的士服務之法。香港的士服務質素係點，相信大家心中有數，政府成立委員會，部分回應咗市民認為的士有善空間嘅訴求。

應反省為何客戶不搭的士

市民對的士服務有幾滿意？有幾不滿？某程度上都反映喺佢哋選取其他召車服務，如Uber，或其他「白牌車」，所謂「用腳來投票」。無他嘅，人哋識得包裝，搵啲靚車司機加盟，加上態度好、有免費紙巾同樽裝水供應等等，市民畀得起錢，就算貴啲都好，都會選呢種「非法白牌車」，算係人之常情囉。不過，正如大家所知，呢啲「非法白牌車」有起意外上嚟，隨時冇法律同保險保障，係唔係繼續搭，真係見仁見智，消費者都要小心做「決定」。

的士違規問題必須正視

廣男之所以認同的士服務有「改善空間」，全因兩個字：「拒載」。的士司機「拒載」嘅理由可謂多不勝數，例如同你講「唔過海」、「唔識路」、「不如行路」、「不如你搭前面架車」、「交更」等等。類似情況，相信唔少市民都試過，廣男喺度唔講咁多啦；講到尾，絕大部份市民都只係想搭車，選「非法白牌車」肯定唔可取，但的士業界都真係做返啲嘢畀人睇先得架，都唔同你講顧客永遠是對的，多少少笑容、講句多謝，唔係咁難囉。

今日政府終於肯成立委員會檢討的士服務質素，撇除服務態度外，廣男覺得政府亦要好好處理違規問題；票控違規司機梗係必然啦，最重要係唔好令到相關規管法例「形同虛設」。所以，要解決好的士服務質素嘅問題，政府首先要有一套有效而且真係會做嘅「執法」制度，處理唔好違規問題，其他服務問題都唔駛點傾。冇錯，的士服務唔好，亦唔係市民光顧「非法白牌車」藉口，但除咗一味話人影響你生計，的士業界都係要自強不息，否則遲早都會被社會淘汰。

原圖：Wenweipo